Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 409 Hüküm no: 475 Orijinal metin no: [76a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı Tamyanos’un Isparta’nın Nis köyündeki bahçesini satması Bahçe mübâya‘ası, 250 guruş, Vilâyet-i Anadolu’da Isparta kazâsına tâbi‘ Nis karyesi re‘âyâsından olup mahmiye-i İstanbul’da Fazlı Paşa kurbünde mütemekkin Sandalcı Tamyanos v. Nikola zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Kiryako v. İvas zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup karye-i mezbûrede vâki‘ bir tarafdan müşteri-yi mersûm Kiryako zimmî menzili ve bir tarafdan Dimitri zimmî bahçesi ve bir tarafdan göl sâhili ve bir tarafdan tarîk-i âm ile mahdûd eşcâr-ı müsmireli bir kıt‘a mülk bahçemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Kiryako zimmîye iki yüz elli guruşa bey‘ ü temlik ve mahâllinde zabta tarafımdan mersûmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr iki yüz elli guruşu müşteri-yi mersûmbana def‘ ü teslîm ben dahi yedinden ahz ü kabz eyledim, fîmâ-ba‘d bahçe-i mahdûd-ı mezkûr mersûm Kiryako zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 26 N sene [1]242. Şühûdü’l-hâl: Hallaçoğlu el-Hâc Ahmed, Muhzır Emin Çelebi, Tercanoğlu Mehmed, Anton v. Yani, Anaştaş v. Yani.