.:: İstanbul Kadı Sicilleri ::.


Mahmudpaşa Mahkemesi 1 Numaralı Sicil (H. 1240-1242 / M. 1825-1827)
cilt: 91, sayfa: 410
Hüküm no: 476
Orijinal metin no: [76a-5]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Anaştaş v. Pavli’nin vefat eden Anaştaş v. Marat’tan intikal eden hissesini diğer vârislerden teslim alması

Mîrâsdan ibrâ,

Vilâyet-i Anadolu’da Kayseriye sancağında Şahhuban mahallesinde mütemekkin iken bundan akdem hâlik olan Anaştaş v. Marat zimmînin verâseti li-ebeveyn kız karındaşları Despino ve Alisovat ve Marya ve Anaşta Nasrâniyelere ve li-ebeveyn ammi oğulları Anaştaş ve Kozma veledey Pavli zimmîlere münhasıra ve tashîh-i meseleri altı sehmden olup sihâm-ı mezbûreden birer sehmden dört sehmi mersûmât Despino ve Alisovat ve Marya ve Anaşta Nasrâniyelere ve birer sehmden iki sehmi mersûmân Anaştaş ve Kozma zimmîlere inhisârı tahakkukundan sonra mersûm Anaştaş zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm mersûmât Despino ve Alisovat ve Marya ve Anaşta Nasrâniyeler taraflarından husûs-ı âti’l-beyânda tasdîka vekîl-i şer‘îsi Kaya v. Sefer zimmî muvâcehesinde bi’l-verâse ikrâr-ı tam ve takrîr-i kelâm edip mûrisimiz hâlik-i mersûmun hîn-i helâkinde yanında mevcûde nakid ve ma‘rifet-i şer‘le tahrîr ve bey‘ olunan terekesi esmânından ba‘de ihrâci’l-mesârifi’l-lâzıme sahhu’l-bâkī müvekkiletân-ı mersûmâtın bi’l-verâse ve bi’l-emâne makbûzları olan altı yüz guruşdan benim hisse-i irsiyeme isâbet eden yüz guruşu müvekkilât-ı mersûmât Despino ve Alisovat ve Marya ve Anaşta Nasrâniyeler vekîl-i mersûm Kaya zimmî yediyle bana def‘ ü teslîm, ben dahi yedinden tamamen ve kâmilen ahz ü kabz eyledim, min-ba‘d meblağ-ı mezbûrdan verese-i [76b] mersûmât ile vekîl-i mersûm yedinde bir akçe ve bir habbe bâkī kalmamağla hukūk-ı mîrâsa müte‘allika da‘vâdan müvekkilât-ı mersûmât Despino ve Alisovat ve Marya ve Anaşta Nasrâniyelerin zimmetlerini ibrâ ve iskāt eyledim dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.]

Fî 29 N sene [1]242.

Şühûdü’l-hâl: Muhzır Emin Çelebi, Muhzır Ali Çelebi, Muhzır Mehmed Çelebi, Kigork v. Mendık, Artin v. Selvi, Yuvan v. Korayil, Keşiş oğlu Pandeli.