Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 411 Hüküm no: 478 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Tıngıroğlu Agob’un menzilini Seyyid Hafız Hüseyin Sabri Efendi’ye satması Menzil, 1500 guruş Mahmiye-i İstanbul’da Vâlide Hanı’nda mütemekkin Sarrâf Tıngıroğlu Agob v. Ohannes zimmî tarafından husûs-ı âti’l-beyânda ikrâra vekîl olduğu Artin v. Ohannes ve Bedros v. Avanes zimmîler şehâdetleriyle sâbit olan Kirkor v. Ohannes zimmî meclis-i şer‘-i hatîr-i lâzımü’t-tevkīrde işbu bâ‘isü’l-vesîka es-Seyyid Hafız Hüseyin Sabri Efendi b. es-Seyyid Mehmed mahzarında bi’l-vekâle ikrâr-ı tam ve takrîr-i kelâm edip müvekkilim mersûm Agob zimmî akd-i âti’z-zikrin sudûruna değin yedimde bâ-hüccet-i şer‘iye müstakıllen mülk ve hakkım olup mahmiye-i mezbûrede Debbâğ Yunus mahallesinde vâki‘ ma‘lûmü’l-hudûd arsası mahalle-i merkūme imâmına senevî yüz seksen akçe icâre-i kadîmeli ve üzerinde mevcûde taş oda ve hamam ve bi’r-i mâ ve sundurma ve kenîf ve etrâf-ı erba‘ası taş duvar ile muhât bir bâb mülk menzilimi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile merkūm es-Seyyid Hafız Hüseyin Sabri Efendi’ye bin beş yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin beş yüz guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim, min-ba‘d menzil-i mezkûr merkūm es-Seyyid Hafız Hüseyin Sabri Efendi’nin mülk-i müşterâsı ve hakk-ı sırfı olup benim aslâ ve kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 L sene [1]242. Şühûdü’l-hâl: Hüseyin Efendi b. Mahmud, es-Seyyid Ali Efendi b. es-Seyyid Halil, es-Seyyid Mehmed Nuri b. es-Seyyid Osman, Molla Ebûbekir Çelebi, Muhzır Emin Çelebi, Muhzır Abdulfettah Çelebi.