Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 413 Hüküm no: 480 Orijinal metin no: [76b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaşiye bt. Aganik’in Serkiz Kalfa Şerbethanesinde olan hissesini İlya’ya satması Şerbethâne 1700 guruş Mahmiye-i İstanbul’da Langa Yenikapısı kurbünde mütemekkine Anaştaşiye bt. Ağanik Nasrâniyenin zevci ve tarafından husûs-ı âti’l-beyânda vekîl olduğu şahsını bilir Apostolaki v. Astori ve Eci Elemiya v. Yuvakip zimmîler şehâdetleriyle sâbit olan Anaştaş v. Avraham zimmî meclis-i şer‘i hatîr-i lâzımü’t-tevkīrde işbu hâmilü’r-rakīm Aci İlya v. Lefter zimmî muvâcehesinde bi’l-vekâle ikrâr-ı tam ve takrîr-i kelâm edip mahmiye-i mezbûrede Kumkapı kurbünde vâki‘ Serkiz Kalfa Şerbethânesi demekle ma‘rûf bir bab kârgîr şerbethâne derûnunda mevcûde nizâmda dâhil ve mu‘teber ve beyne’l-esnâf gedik ta‘bîr olunur bir destgâh ve elli fıçı ve yüz iskemle ve elli kadeh ve elli bardak ve yirmi beş bâdiye ve iki kantar ve sâir âlât-ı lâzıme-i ma‘lûme yüz yirmi sehm i‘tibârıyla altı buçuk sehmi müvekkilem zevcem mersûmenin ve on beş sehmi müşteri-yi mersûmun ve altmış dört buçuk sehmi Kiryako zimmînin ve on beş sehmi Aci Frankoli ve Aci Marya’nın ve altı sehmi Aci Zoyi’nin ve altı buçuk sehmi Derosi’nin ve altı buçuk sehmi Aci Eleniko’nun yedimizde irsen ve şirâen emvâlimiz olmağla ben müvekkilem zevcem mersûmenin âlât-ı muharrere-i mezkûrede ber-i‘tibâr-ı mezkûr mâlik olduğu altı buçuk sehm hissesini tarafından îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bi’l-vekâle bâ-izn-i şürekâ müşteri-yi mersûm İlya zimmîye bin yedi yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin yedi yüz guruşu müşteri-yi merkūm bana def‘ ü teslîm ben dahi yedinden bi’l-vekâle tamamen ahz ü kabz eyledim, fîmâ-ba‘d âlât-ı muharrere-i mezkûrenin ber-i‘tibâr-ı mezbûr yirmi bir buçuk sehmi mersûm İlya zimmînin emvâl-i mahzı ve hakk-ı sırfı olup müvekkilem zevcem mersûmenin kat‘a alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 22 N sene [1]242. Şühûdü’l-hâl: Muhzır Emin Çelebi, Muhzır Ali Çelebi. Kumkapı Ustabaşısı Kiryako v. Sava, Ustabaşı Velut v. Makar, Langa Ustabaşısı Apostolaki v. Espozi, Eci Haçador v. Hürmüz, Fenar Ustabaşısı Zora v. Toros, Usta Haralam v. Eci Azarya, Usta Kostandi, Usta Ligor …?.