Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 414 Hüküm no: 482 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oskohi bt. Kiragos’un Çilingir dükkânı içinde gedik denilen âletlerini satması Çilingir Gediği, 500 guruş, Mahmiye-i İstanbul’da Kumkapı dâhilinde mütemekkine ve şahsını zeyl-i vesîkada muharrerü’l-esâmî kimesneler ta‘rîfleriyle mu‘arrefe olan Oskohi bt. Kiragos Nasrâniye meclis-i şer‘-i hatîr-i lâzımü’t-tevkīrde işbu hâmilü’r-rakīm Kirkor v. Ohan zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Kadırga Limanı kurbünde berber ve kahve dükkânları beynlerinde kâin bir bâb Çilingir dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme müstakılleten yedimde emvâlim olmağla ben âlât-ı muharrere-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Kirkor zimmîye beş yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz guruşu müşteri-yi mersûm bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d âlât-ı ma‘lûme-i mezkûre mersûm Kirkor zimmînin emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan herbirimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 22 N sene [1]242. Şühûdü’l-hâl: Muhzır Ali Çelebi, Muhzır Mehmed Çelebi, Muhzır Emin Çelebi, Artin v. Agob, Kokas v. Arakil, Artin v. Arsin, Serkiz v. Haçador.