Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 415 Hüküm no: 483 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Abdülbaki Efendi’nin çubukçu dükkânı hissesini Osman’a satması
Çubukçu, 660 guruş
Mahrûse-i Galata’ya muzâfe kasaba-i Beşiktaş’da Abdülbâki Efendi b. Mehmed tarafından husûs-ı âti’l-beyânda vekîl olduğu Ali Ağa b. Mehmed ve İbrahim Ağa b. Mustafa şehâdetleriyle sâbit olan Ahmed Ağa b. el-Hâc İsmail meclis-i şer‘-i şerîf-i enverde işbu bâ‘isü’l-vesîka İbrahim Edhem Ağa b. Osman mahzarında bi’l-vekâle ikrâr-ı tam ve takrîr-i kelâm edip mahmiye-i İstanbul’da Sultanhamamı civârında Alacahamam mahallesinde vâki‘ bir tarafdan Ekmekçi tablakârı dükkânı ve Sırrı Efendi menzili ve bir tarafdan Postalcı dükkânı ve iki tarafdan tarîk-i âm ile mahdûd beher sene yüz kırk para mukāta‘alı bir oda ve arkasında bir kapıyı müştemil beher şehr yüz kırk para icâreli iki kepenk çubukçu dükkânı üç sehm i‘tibârıyla iki sehmi müvekkilim mezbûrun ve bir sehmi kız karındaşı Emine Hatun’un yedlerinde mülkleri olmağla ben dükkân-ı mezkûrdan müvekkilim mezbûrun mâlik olduğu iki sehm hissesini havasıyla? tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr İbrahim Edhem Ağa’ya altı yüz altmış guruşa bi’l-vekâle bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr altı yüz altmış guruşu müşteri-yi merkūm bana def‘ ü teslîm ben dahi yedinden bi’l-vekâle tamamen ahz ü kabz eyledim, fîmâ-ba‘d dükkân-ı mezbûrun ber-i‘tibâr-ı mezbûr iki sehmi mezbûr İbrahim Edhem Ağa’nın mülk-i müşterâsı ve hakk-ı sırfı olup müvekkilim mezbûrun kat‘a alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan bi’l-vekâle merkūm İbrahim Edhem Ağa’nın zimmetini bi’l-vekâle ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.]
Fî 24 N sene [1]242.
Şühûdü’l-hâl: Ali Çelebi el-muhzır, Mehmed Çelebi el-muhzır, Ebûbekir Çelebi el-muhzır.
|