Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 424 Hüküm no: 498 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer’in vefat eden kız kardeşinin terekesini teslim alması İsbât-ı verâset, eşyâ ahz [ü] kabz hücceti, Vilâyet-i Anadolu’da Afyonkarahisârı kasabası mahallâtından Mahkeme mahallesi ahâlisinden olup mahmiye-i İstanbul’da Süleymaniye kurbünde İmâm menzilinde sâkine iken bundan akdem müteveffiye olan Şerife Kezban nâm-ı diğer Mehtab bt. Mehmed Memiş b. Mustafa’nın li-ebeveyn er karındaşı ve hasran vârisi olduğunu iddi‘â eden işbu bâ‘isü’l-vesîka es-Seyyid Ömer meclis-i şer‘-i şerîf-i enverde zâtı mu‘arrefe Habibe bt. el-Hâc Halil nâm Hatun mahzarında üzerine da‘vâ ve takrîr-i kelâm edip ben müteveffiye-i mezbûre Şerife Kezban nâm-ı diğer Mehtab ile li-ebeveyn karındaşlar olup babamız ismi Mehmed Memiş ve dedemiz ismi Mustafa ve vâlidemiz ismi Fatıma bt. Mehmed Sadık ve maskat-ı resimiz zikr olunan Mahkeme mahallesi olup ol-vechile müteveffiye-i mezbûrenin verâseti ancak bana münhasıra olup benden gayrı vârisi ve terekesine müstahakk-ı âharı olmamağla müteveffiye-i mezbûrenin hîn-i vefâtında yanında mevcûde terekesinin mecmû‘u müsta‘mel bir döşek ve bir yorgan ve iki baş yasdığı ve bir işleme makreme ve bir döşek çârşebi ve bir yorgan çârşebi ve bir şalî entari ve bir İngiliz-kârî şal ve bir nîmten yemeni hırka ve bir kebîr havlu ve bir tülbend gömlek ve bir şalî şalvar ve iki bez don ve def‘a bir İngiliz-kârî şal ve bir yeşil çuka ferâce ve bir yazma yemeni ve def‘a iki gömlek ve bir silecek havlu ve bir şalî entari ve iki hakīr entari ve iki hakīr yelek ve iki uçkur ve bir gül yüzük ve bir çift elmaslıca zümrüd küpe ve bir elmas iğneyi mezbûre Habibe Hatun kabz ve vaz‘-ı yed etmekle tereke-i müteveffiye-i mezbûreyi mezbûre Habibe Hatun’dan verâset-i mahkiyem hasebiyle taleb ederim, suâl olunsun dedikde gıbbe’s-suâl mezbûre Habibe Hatun dahi cevâbında müteveffiye-i mezbûrenin terekesinden bir döşek ve bir yorgan ve iki baş yasdığı ve bir işleme makreme ve bir döşek çârşebi ve bir yorgan çârşebi ve bir şalî entari ve bir İngiliz-kârî şal ve bir nîmten yemeni hırka ve bir kebîr havlu ve bir dülbent gömlek ve bir şalî şalvar ve iki bez don ve def‘a bir İngiliz-kârî şal ve bir yeşil çuka ferâce ve bir yazma yemeni ve def‘a iki gömlek ve bir silecek havlu ve bir şalî entari ve iki hakīr entari ve iki hakīr yelek ve iki uçkur ve bir gül yüzük ve bir çift elmaslıca zümrüd küpe ve bir elmas iğne kabz ve el-yevm yedinde mevcûde olduğunu ikrâr, müdde‘î-i mezbûrun verâseti ma‘lûmum değildir deyü inkâr edicek müdde‘î-i merkūmdan ber-vech-i muharrer verâset müdde‘âsına mutâbık beyyine taleb olundukda ahrâr-ı ricâl-i Müslimînden ve kazâ-i mezbûr ahâlisinden el-Hâc Halil b. el-Hâc Abdullah ve Ömer b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i merkūm müteveffiye-i mezbûre Kezban nâm-ı diğer Mehtab ile li-ebeveyn karındaşlar olup babaları ismi Mehmed Memiş ve dedeleri ismi Mustafa ve vâlideleri ismi Fatıma bt. Mehmed Sadık ve maskat-ı resleri zikr olunan Mahkeme mahallesi olup ol-vechile müteveffiye-i mezbûrenin verâseti ancak merkūm es-Seyyid Ömer’e mevrûs olup bundan gayrı vârisi ve terekesine müstahakk-ı âharı olduğu bizim ma‘lûmumuz değildir, biz bu husûsa bu vech üzere şâhidleriz ve şehâdet dahi ederiz deyü herbiri müttefikü’l-lafz ve’l-ma‘nâ edâ-yı şehâdet-i şer‘iye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mezbûr es-Seyyid Ömer yine meclis-i şer‘-i şerîfde mezbûre Habibe Hatun muvâcehesinde ânifen edâsına hükm ve tenbîh olunan bir döşek ve bir yorgan ve iki baş yasdığı ve bir işleme makreme ve bir döşek çârşebi ve bir yorgan çârşebi ve bir şalî entari ve bir İngiliz-kârî şal ve bir yemeni hırka ve bir kebîr havlu ve bir tülbend gömlek ve bir şalî şalvar ve iki bez don ve def‘a bir İngiliz-kârî şal ve bir yeşil çuka ferâce ve bir yazma yemeni ve def‘a iki gömlek ve bir silecek havlu ve bir şalî entari ve iki hakīr entari ve iki hakīr yelek ve iki uçkur ve bir gül yüzük ve bir çift elmaslıcı zümrüd küpe ve bir elmas iğneyi mezbûre Habibe Hatun bana def‘ ü teslîm, ben dahi yedinden tamamen ahz ü kabz eyledim dedikde mâ-vaka‘a [bi’t-taleb ketb olundu.] Fî 6 L sene [1]242. Şühûdü’l-hâl: Subaşı Musa, Muhzır Emin Çelebi, Muhzır Ali Çelebi.