Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 426 Hüküm no: 499 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ubaniçe bt. Kostaki’nin tabib dükkânındaki gedik olan âletlerini satması Tabib dükkânı, 400 guruş Mahmiye-i İstanbul’da Fenerkapısı hâricinde Karabaş mahallesinde mütemekkine ve şahsı zeyl-i rakīmde muharrerü’l-esâmî kimesneler ta‘rîfleriyle mu‘arrefe Ubaniçe bt. Kostaki nâm Nasrâniye meclis-i şer‘-i <<şerîf-i enverde>> hatîr-i lâzımü’t-tevkīrde işbu hâmiletü’r-rakīm [79a] Anna bt. İstepan Nasrâniyenin karındaşı ve tarafından husûs-ı âti’l-beyânda tasdîka vekîl-i şer‘îsi Agob v. el-mersûm İstepan zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Sultan Bâyezid kurbünde Tavukçular civârında vâki‘ berber ve su dükkânları beynlerinde kâin bir bâb tabîb dükkânı derûnunda mevcûde beyne’l-esnâf gedik ta‘bîr olunur çâr köşe on iki şişe ve beş ibrik ve altı kavanoz ve bir tunç havan ve on kutu ve iki terâzî ma‘a derâhim ve on billûr şişe ve iki tencere ve bir inbik ve sâir âlât-ı lâzıme-i muharrere-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûme Anna Nasrâniyeye dört yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr dört yüz guruşu müşteriye-i mersûme bana def‘ ü teslîm ben dahi yedinden tamamen ahz ü kabz eyledim, fîmâ-ba‘d âlât-ı lâzıme-i muharrere-i mezkûre mersûme Anna Nasrâniyenin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûme Anna Nasrâniyenin zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 L sene [1]242. Şühûdü’l-hâl: Muhzır İsmail Çelebi, Muhzır Ali Çelebi, Muhzır Mehmed Çelebi, Muhzır Ebûbekir Çelebi.