Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 427 Hüküm no: 500 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Yorgi’nin menzilini satması Menzil mübâya‘ası, 550 Mahmiye-i İstanbul’da Yenimahalle’de mütemekkin Terzi Yorgi v. Ligori zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm kendinden asıl ve zevcesi Yakut bt. Bağdisar Nasrâniye tarafından husûs-ı âtîde tasdîka vekîl-i şer‘îsi Avanes v. Ohan zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye müstakıllen yedimde mülk ve hakkım olup Rodoscuk nâm-ı diğer Tekfurdağı kasabası mahallâtından Filibos mahallesinde vâki‘ bir tarafdan Vartan zimmî menzili ve bir tarafdan İlya zimmî menzili ve bir tarafdan tarîk-i hâs ve bir tarafdan tarîk-i âm ile mahdûd ma‘lûmü’l-müştemilât bir bâb mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûmân Yakut ve Avanes’e ale’l-iştirâk beş yüz elli guruşa bey‘ ü temlik ve mahâllinde zabta tarafımdan mersûmânı taslît eylediğimde onlar dahi ber-vech-i muharrer iştirâken iştirâ ve temellük ve kabûl eylediklerinden sonra semeni olan meblağ-ı mezbûr beş yüz elli guruşu müşteriyân-ı mersûmân bana def‘ ü teslîm, ben dahi yedlerinden tamamen ahz ü kabz eyledim, fîmâ-ba‘d menzil-i mahdûd-ı mezkûr zevcân-ı mersûmân Yakut ve Avanes’in ale’l-iştirâki’s-seviyy mülk-i müşterâları ve hakk-ı sırfları olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûmân Yakut ve Avanes’in zimmetlerini ve mersûm Avanes zimmî dahi ancak bi’l-asâle benim zimmetimi ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 9 L sene [1]242. Şühûdü’l-hâl: Ali Çelebi el-muhzır, Ebûbekir Çelebi el-muhzır, Abdulfettah Çelebi el-muhzır, Mehmed Emin Çelebi el-muhzır.