Bab Mahkemesi 54 Numaralı Sicil (H. 1102 / M. 1691) cilt: 20, sayfa: 153 Hüküm no: 150 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed Ağa b. Mustafa’nın kölesi Hacı Hüseyin’in varislerince azat edilmesi Mahmiye-i İstanbul’da Zeyrek mahallesinde sâkin iken bundan akdem vefât eden Tokatlızâde el-Hâc Ahmed Ağa b. Mustafa b. Abdülmennân’ın verâseti, sulbî kebîr oğulları Mehmed Ağa ve Mustafa Ağa’ya münhasıra olduğu şer‘an zâhir ve mütehakkik oldukdan sonra mezbûr Mehmed Ağa asâleten ve karındaşı mezbûr Mustafa Ağa tarafından husûs-ı âti’l-beyâna vekîl olduğu mahalle-i mezbûre sâkinlerinden Murtaza Beşe b. İbrahim ve Ahmed Bey b. Osman nâm kimesneler şehâdetleriyle şer‘an sâbit olmağla vekâleten meclis-i şer‘-i şerîf-i enver ve mahfil-i dîn-i münîf-i ezherde asâleten ve vekâleten ikrâr ve takrîr-i kelâm edip, babamız müteveffâ-yı mezbûr el-Hâc Ahmed Ağa, kendiye rıkkını mu‘terif olan işbu orta boylu, açık kaşlı, elâ gözlü Nemçeviyyü’l-asl bâ‘isü hâze’l-kitâb el-Hâc Hüseyin b. Abdullah nâm abd-i memlûkünü, târih-i kitâbdan dört sene mukaddem hasbeten lillâhi’l-meliki’l-hallâk ve taleben li merzâti’r-rabbi’r-rezzâk mâlından tahrîr ve i‘tâk ve zümre-i ahrâr-ı asliyyîne idrâc ve ilhâk edip, mevsûf-ı mezbûr el-Hâc Hüseyin târih-i mezbûrdan beri sâir ahrâr-ı asliyyîn gibi hür olmuşdur, bizim kat‘â alâkam ve medhalim yokdur dedikde, mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelâhire li sene isneteyn ve mi’e ve elf. Şuhûdü’l-hâl: Müezzin Mustafa Efendi b. Mehmed Efendi, Hasan Çelebi keyyâl-i kapan, el-Hâc Hasan b. Receb, Mustafa Efendi sahhâf, el-Hâc Ebûbekir Efendi b. Hasan, el-Hâc Hasan b. Abdullah.