Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 444 Hüküm no: 525 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hasan’ın vârislerinin Seyyid Mehmed Salih’i vekil tayin etmeleri Vekâlet Vilâyet-i Anadolu’da Kastamonu sancağında Daday kazâsına tâbi‘ Çerçiler karyesi ahâlisinden olup mahmiye-i İstanbul’da Kâtib Kasım mahallesinde sâkin iken bundan akdem fevt olan İbrahim b. Hasan b. Abdullah’ın verâseti zevce-i menkûha-i metrûkesi Nefise bt. Ali nâm hatun ile sulbî kebîr oğulları es-Seyyid Mehmed Salih ve es-Seyyid Mustafa’ya inhisârı tahakkukundan sonra mezbûr es-Seyyid Mustafa ile zâtı mu‘arrefe mezbûre Nefise Hatun meclis-i şer‘-i şerîf-i enverde karındaşı işbu bâ‘isü’l-vesîka mezbûr es-Seyyid Mehmed Salih mahzarında ikrâr-ı tam ve takrîr-i kelâm edip mezbûr es-Seyyid Mustafa karye-i mezbûrede vâki‘ ma‘lûmü’l-hudûd bir bâb mülk menzil ve bir ahır ve bir samanhâne mûrisimiz müteveffâ-yı mezbûr İbrahim’in hayatında ile’l-vefât yedinde müstakıllen mülkü ve kezâlik ma‘lûmü’l-hudûd iki kıt‘a tarla dahi bâ-tapu taht-ı tasarrufunda olup ba‘de vefâtihî zikr olunan menzil benimle karındaşım mezbûr es-Seyyid Mehmed Salih’e âdiyen intikāl edip lâkin emlâk-ı muharrere-i mezkûre ile zikr olunan tarlaları dahi ba‘zı kimesneler zabt etmeleriyle emlâk-ı muharrere-i mezkûreyi vâzı‘ü’l-yed olanlardan mahâllinde taleb ve da‘vâ ve ahz ü kabza bizim hisselerimizi hissesiyle ma‘an semen-i misilleriyle âhara bey‘e ve zikr olunan tarlaları dahi bedel-i misilleriyle âhara ferâğa ve kabz-ı semen ve bedel makbûzundan bizim hisselerimizi îsâl ve teslîme ve husûs-ı mezkûr mütevakkıf olduğu umûrun küllîsine tarafımızdan merkūm es-Seyyid Mehmed Salih vekîl ve nâib-i menâb nasb ü ta‘yîn eyledik dediklerinde ol dahi vekâlet-i mezkûreyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 20 L sene [1]242. Şühûdü’l-hâl: Bakırcı Derviş Mehmed, oğlu es-Seyyid Mehmed Salih, Hacı Salih Efendi.