Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 445 Hüküm no: 526 Orijinal metin no: [81b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın berber dükkânı gediğini Mehmed Arif Ağa’ya satması Nısf Berber Ricâl-i Devlet-i aliyye’den hâlâ Şıkk-ı evvel el-Hâc İbrahim Edhem Efendi’nin çukadârlarından olup mahmiye-i İstanbul’da Ahırkapı kurbünde sâkin İbrahim Ağa b. Halil meclis-i şer‘-i şerîf-i enverde bâ‘isü’l-vesîka berber esnâfından Mehmed Ârif Ağa b. Mehmed mahzarında ikrâr-ı tam ve takrîr-i kelâm edip mahmiye-i mezbûrede Kadırga Limanı’nda vâki‘ muhterik kasab dükkânı arsası ve berber Mehmed Ağa dükkânı beynlerinde kâin şehriye üçer guruş kirâ-yı kadîmeli iki kepenk bir bâb berber dükkânı [derûnunda] mevcûde Başmuhâsebe Kalemi’nde [82a] mukayyed ve mu‘teber ve beyne’l-esnâf gedik ta‘bîr olunur on ustura ve bir kayış ve bir mikrâs ve bir kazgan ve iki leğen ve bir tas ve bir tepsi ve bir ayna ve bir mangal ve bir çekmece ve sâir âlât-ı lâzıme-i ma‘lûme müstakıllen yedimde emvâlim olmağla ben âlât-ı muharrere-i mezkûrenin nısf-ı şâyi‘lerini yedimde ibkā ve mâ‘adâ nısf-ı şâyi‘-i âharlarını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Ârif Ağa’ya bin yedi yüz yetmiş beş guruşa bey‘ ü temlik ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin yedi yüz yetmiş beş guruşu müşteri-yi merkūm yedinden tamamen ahz ü kabz eyledim. fîmâ-ba‘d âlât-ı muharrere-i mezkûrenin nısf-ı şâyi‘-i âharları merkūm Mehmed Ârif Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde, gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 16 L sene [1]242. Şühûdü’l-hâl: Kethudâ İbrahim Ağa, Şeyh el-Hâc Abdi Efendi, Du‘âcı İsmail Efendi, Yiğitbaşı es-Seyyid Nuri Ağa, Çavuş Mustafa Efendi, Molla Ebûbekir Çelebi, Muhzır Feyzullah Çelebi.