Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 446 Hüküm no: 527 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın evindeki bazı eşyalarını satması Husûs ile eşyâ, nefy-i mülk, 150 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Mevlana es-Seyyid Numan Efendi mahmiye-i İstanbul’da Hocapaşa mahallesinde vâki‘ Osman Ağa b. Hasan’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mezbûr Osman Ağa meclis-i ma‘kūd-ı mezkûrda hâlâ zevcesi işbu bâ‘isetü’l-vesîka zâtı mu‘arrefe Şerife Hafize bt. İsmail nâm Hatun mahzarında ikrâr-ı tam ve takrîr-i kelâm edip eşyâ-yı memlûkemden iki Acem şalı ve bir çuka şalvar ve bir çuka cübbe ve bir entari ve bir câmeşûy leğeni ve bir sini ve iki tencere ve bir döşek ve bir şilte ve bir baş yasdığı ve iki yorganımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Şerife Hafize Hatun’a yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr yüz elli guruşu zevcem müşteriye-i mezbûre bana def‘ ve teslîm, ben dahi yedinden tamamen ahz ü kabz eyledim. Fîmâ-ba‘d eşyâ-yı muharrere-i mezkûre zevcem mezbûre Şerife Hafize Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ işbu derûnunda akd-i meclis olunan menzilde mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayrı nühâsiyenin mecmû‘u zevcem mezbûrenin malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem olmayıp ve hukūk-ı şer‘iyeden dahi hakkım ve alacağım yokdur dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 14 L sene [1]242. Şühûdü’l-hâl: Es-Seyyid Hafız İbrahim Efendi b. es-Seyyid Mustafa, Eskicibaşı Mehmed Ağa b. Mehmed, Muhzır Ali Çelebi, Mehmed Efendi b. İbrahim, Hasan Ağa b. Mehmed, Ebûbekir b. Hüseyin.