Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 447 Hüküm no: 529 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe bt. Hacı İsmail’in menzil arsasını satması Arsa mübâya‘ası, 1000 guruş Mahmiye-i İstanbul’da Ayasofya kurbünde İshak Paşa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Nesibe bt. el-Hâc İsmail nâm Hatun meclis-i şer‘-i şerîf-i enverde hâlâ Tersâne-i âmire nâzırı devletlü es-Seyyid el-Hâc Mehmed Said Efendi b. el-Hâc Ahmed Ağa tarafından husûs-ı âti’l-beyânda tasdîka vekîl-i şer‘îsi es-Seyyid İbrahim Ağa b. es-Seyyid Mehmed mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bi’l-irsi’ş-şer‘î müstakıllen yedimden mülk ve hakkım olup mahmiye-i mezbûrede Eminbey mahallesinde vâki‘ ma‘lûmü’l-hudûd terbî‘an altmış zirâ‘ muhterik mülk menzil arsamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i mûmâ-ileyh el-Hâc Mehmed Said Efendi’ye bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin guruşu müşteri-yi mûmâ-ileyh bana def‘ ü teslîm, ben dahi yedinden tamamen ahz ü kabz eyledim. fîmâ-ba‘d arsa-i mahdûd-ı mezkûr müvekkil-i mûmâ-ileyh el-Hâc Mehmed Said Efendi’nin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan efendi-yi mûmâ-ileyhin zimmetini ibrâ ve iskāt eyledim dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 23 [Şevvâl] sene [1]242. Şühûdü’l-hâl: Muhzır Ali Çelebi, el-Hâc Abdullah Efendi b. Abdurrahman, Latif Ağa, Halil Ağa [b.] Ebûbekir Ağa, el-Hâc Musa Ağa, Muhzır Emin Çelebi.