Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 448 Hüküm no: 530 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahtakale’de Kadı Hanı altındaki berber dükkânındaki âletlerin Ohan ve Avanes’e ait olduğunun tescili İhbâr Hücceti Mahmiye-i İstanbul’da Mahmudpaşa kurbünde Yıldız Hanı’nda mütemekkin Berber esnâfından Ohan v. Kirkor zimmî Avanes v. İstefan zimmî hâzır olduğu hâlde meclis-i şer‘-i hatîr-i lâzımü’t-tevkīrde yine esnâf-ı merkūmeden es-Seyyid Mehmed Nuri Ağa b. es-Seyyid Osman ve Berber Aleksan v. Latif’in ve Asador v. Zaver zimmîler hâzır oldukları hâlde takrîr-i kelâm ve ta‘bîr ani’l-merâm edip mahmiye-i mezbûrede Tahtakale’de Kādı Hanı tahtında tütüncü ve Halil dükkânları beynlerinde kâin beher mâh beşer guruş icâreli üç kepenk bir bâb berber dükkânı derûnunda mevcûde beyne’l-esnâf gedik ta‘bîr olunur bir kazgan ve on ustura ve üç leğen ve üç sitil ve üç boğaz leğeni ve üç kayış ve bir bileyi taşı ve on beş havlu ve yedi peşkir ve sâir âlât-ı lâzıme-i ma‘lûmenin nısfları şirâen benim ve nısfları işbu hâzır bi’l-meclis Avanes zimmînin babasından irsen malımız olup lâkin yedimizde sened-i şer‘îmiz olmamağla hakīkat-i hâl hâzırûn-ı mersûmûndan lede’l-istihbâr kıbel-i şer‘den li-ecli’l-istihkâm yedimize birer kıt‘a hüccet-i şer‘iye i‘tâ olunmak matlûbumuzdur dedikde hâl bâlâda bast olunan minvâl-i muharrer üzere olup ve zikr olunan dükkân derûnunda mevcûde âlât-ı lâzıme-i ma‘lûmenin nısfları mersûm Ohan zimmînin şirâen ve nısf-ı âharları hâzır-ı mersûm Avanes zimmînin babasından irsen yedlerinde mâlları olduğunu hâzırûn-ı mersûmûndan her biri meclis-i şer‘de alâ-tarîki’ş-şehâde haber vermeleriyle vâki‘u’l-hâl hıfzen li’l-makāl işbu vesîka-i enîka bi’t-taleb ketb ü tahrîr ve li-ecli’l-istihkâm mersûmân Ohan ve Avanes yedlerine i‘tâ olundu. Fî 17 L sene [1]242. Şühûdü’l-hâl: Ebûbekir Çelebi el-muhzır, Muhzır Fettah Çelebi, Muhzır Ali Çelebi.