Bab Mahkemesi 54 Numaralı Sicil (H. 1102 / M. 1691) cilt: 20, sayfa: 154 Hüküm no: 151 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gürcü Yusuf’un terekesinin tamâmının beytülmâla teslim edilmesi Dârü’l-hilâfeti’l-aliyyeti’l-Osmâniyye Kostantıniyye el-mahmiye’de beytülmâl hâssa emîni olan fahrü’l-akrân Ahmed Ağa b. Abdülmennân’ın vekîl-i müsecceli olan Mehmed Çelebi b. Mustafa meclis-i şer‘-i şerîf-i enverde, mahmiye-i mezbûrede Sîmkeş mahallesi sâkinlerinden Ali b. Abdullah nâm kimesne mahzarında ikrâr-ı tâm ve takrîr-i kelâm edip, bundan akdem Gürcü Yusuf nâm mezbûr Ali’nin menzilinde sâkin iken bilâ-vâris fevt olup, terekesi beytülmâle âid olmağla müteveffâ-yı mezbûrun terekesinden iki köhne dolama ve zibun ve bir kara kilim ve iki köhne gömlek ve sâir kalîl ü kesîr ü celîl ü hakīr eşyâsını merkūm Ali bana def‘ ve teslîm, ben dahi mezbûr Ali’nin yedinden bi’l-vekâle ahz u kabz edip, tereke-i müteveffâ-yı mezbûrdan mezbûr Ali yedinde ve kıbelinde aslâ ve kat‘â bir nesne kalmamışdır dedikde, gıbbe’t-tasdîki’l-mu‘teberi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cumâdelâhire sene 1102. Şuhûdü’l-hâl: Ahmed Çelebi b. Mehmed, İbrahim Çelebi b. Ahmed, Siyavuş b. Abdullah, Mustafa b. Şaban, İbrahim Çelebi b. Mehmed.