Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 449 Hüküm no: 531 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin bazı eşyalarını eşi Fatıma Hanım’a satması ve vasiyetnamesi Husûs ile eşyâ mübâya‘ası vasiyet. Husûs-ı âti’l-beyânın mahâllinde ketb ü tahrîri için savb-ı şer‘i’l-enverden bi’l-iltimâs irsâl olunan Boluvîzâde müderrisîn-i kirâmdan es-Seyyid Mehmed Esad Efendi mahmiye-i İstanbul’da Yenibahçe kurbünde sarmaşık mahallesinde vâki‘ müderrisîn-i kirâmdan el-Hâc Mustafa Efendi b. Süleyman b. Abdullah’ın menziline varıp zeyl- i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde merkūm Mustafa Efendi meclis-i ma‘kūd-ı mezkûrda zevcesi ve ber-vech-i âtî vesâyâ-yı mu‘ayyenesini tenfîze vasîyy-i muhtâre nasb ü ihtiyâr eylediği işbu bâ‘isetü’l-vesîka Fatıma bt. el-Hâc Ahmed nâm hatun tarafından husûs-ı âtîde tasdîka vekîl-i şer‘îsi müderrisîn-i kirâmdan es-Seyyid Mehmed Kâmil Efendi b. Abdurrahim mahzarında ikrâr-ı tam ve takrîr-i kelâm edip eşyâ-yı memlûkemden iki yorgan ma‘a çârşeb ve on iki beledî yasdık ve bir nühâs mangal ve bir tas ve iki sahan ma‘a kapak ve bir kaftan? ve bir bol yenli sincap kürk ve bir nâfe kürk ve bir sarı Lahûrî şal ve bir sarı Mağribî şal ve iki çakşır ve iki çuka biniş ve iki şalî biniş ve bir şalî cübbe ve iki çuka cübbe ve bir sof ferâce ve üç sarık ve üç yün memlû minderi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Fatıma Hatun’a beş yüz guruşa bey‘ ü temlik ve yine malımdan bir sîm Fârisî sâ‘atimi dahi hibe-i sahîha-i şer‘iye ile zevcem mezbûreye hibe ve temlik ve teslîm eylediğimde, ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz guruşu zevcem mezbûre bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d eşyâ-yı muharrere-i mezkûre zevcem mezbûrenin emvâl-i müşterâsı ve hakk-ı sırfı olup benim kat‘a alâka ve medhalim kalmayıp zevcem mezbûrenin yed ve hıfzında olan bin guruşdan mâ‘adâ meclis olunan işbu menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayrı nühâsiyenin mecmû‘u zevcem mezbûre Fatıma Hatun’un malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem olmayıp ben bi-emrillâhi te‘âlâ vefât eylediğimde malım olup zikri mürûr eden bin guruşdan sünnet-i seniyye üzere techîz ve tekfînim görülüp düyûn-ı müsbetem zuhûr eder ise ba‘de’l-edâ bâkī kalan meblağın sülüsünü ifrâz ve sülüs-i mezkûrdan yüz yirmi guruş iskāt-ı salât ve kefâret-i savm ve yemînim ve nüzûrâtım için devir ve fukarâya tasadduk oluna ve yine sülüs-i mezkûrdan yüz elli guruş ile işbu menzil kapısı önünde köşe başına varınca tarîk-i âmmın ta‘mîr oluna ve sülüsân terekem dahi zevcem mezbûre ile sâir veresem beynlerinde alâ mâ-farazallâhu te‘âlâ tevzî‘ ve taksîm oluna deyü vasiyet ve tenfîzine zevcem mezbûre Fatıma Hatun’u vasîyy-i muhtâr nasb ü ta‘yîn eylediğimde, ol dahi ber-vech-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eyledi dedikde, gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylemeğin mâ-vaka‘a [bi’t-taleb ketb olundu.] Fî 13 L sene [1]242. Şühûdü’l-hâl: Kavukçu Hüseyin Efendi, es-Seyyid Feyzullah b. Mehmed, Terlikçi Molla Süleyman, es-Seyyid Mustafa Efendi, Ali Efendi b. Mustafa, Muhzır Ebûbekir Çelebi, Şükrullah Efendi, Mehmed Said b. es-Seyyid Mustafa, es-Seyyid Mehmed Ağa b. İbrahim, es-Seyyid Ahmed b. Hüseyin, Kavukçu İsmail Efendi.