Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 450 Hüküm no: 532 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmaniye Camii kapısı civarındaki Kalpakçı dükkânındaki âletlerin Artin’e ait olduğunun tescili İhbâr hücceti Mahmiye-i İstanbul’da Yenikapı kurbünde mütemekkin Kalpakçı esnâfından Artin v. Kirkor zimmî meclis-i şer‘-i hatîr-i lâzımü’t-tevkīrde yine esnâf-ı mezbûre kethudâsı Mıgırdıç v. Artin ve kābız-ı mâl Mıgırdıç v. Adam ve Ağya v. Karabet ve Ağyazar v. Avanes zimmîler hâzır oldukları hâlde takrîr-i kelâm ve ta‘bîr ani’l-merâm edip mahmiye-i mezbûrede Osmaniye Câmi‘-i şerîfi kapısı civârında Çubukçu ve çeşme beynlerinde kâin bir bâb kârgîr kalpakçı dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin bin iki yüz otuz iki senesinden beri gāib ani’l-meclis Kalpakçı Bedros zimmîden iki bin üç yüz guruşa şirâen bâ-hüccet-i şer‘iye malım olup lâkin yedimde olan hüccet-i şer‘iyem zâyi‘ olmağla hakīkat-i hâl hâzırûn-ı mersûmûndan lede’l-istihbâr kıbel-i şer‘den li-ecli’l-istihkâm yedime bir kıt‘a hüccet-i şer‘iye i‘tâ olunmak matlûbumdur dedikde, hâl bâlâda bast olunan minvâl-i muharrer üzere olup ve zikr olunan dükkân derûnunda mevcûde bâ-defter-i müfredât âlât-ı lâzıme-i ma‘lûme mersûm Artin zimmînin târih-i mezkûrdan beri gāib-i mersûm Bedros zimmîden iki bin üç yüz guruşa şirâen yedinde emvâli olduğunu hâzırûn-ı mersûmûndan her biri meclis-i şer‘de alâ-tarîki’ş-şehâde haber vermeleriyle vâki‘u’l-hâl hıfzen li’l-makāl işbu vesîka-i enîka bi’t-taleb ketb ü tahrîr ve li-ecli’l-istihkâm mersûm Artin zimmî yedine i‘tâ olundu. Fî 16 L sene [1]242. Şühûdü’l-hâl: Muhzır Emin Çelebi, Muhzır İbrahim Çelebi, Muhzır Ali Çelebi.