Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 451 Hüküm no: 533 Orijinal metin no: [82b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Ağa’nın bazı eşyalarını eşine satması Eşyâ mübâya‘ası 60 guruş. Mahmiye-i İstanbul’da Balat kapısı kurbünde Molla Kasım Gönânî mahallesinde sâkin Mehmed Sadık Ağa b. Mehmed meclis-i şer‘-i şerîf-i enverde hâlâ zevcesi işbu bâ‘isetü’l-vesîka Zeliha bt. Yusuf nâm hatun tarafından husûs-ı âti’l-beyânda tasdîka vekîl-i şer‘îsi Molla Ali b. İbrahim mahzarında ikrâr-ı tam ve takrîr-i kelâm [83a] edip eşyâ-yı memlûkemden bir minder ve bir yorgan ve bir baş yasdığı ve bir sepet sandık ve bir seccâde ve bir entari ve bir Acem şalı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem müvekkile-i mezbûre Zeliha Hatun’a altmış guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr altmış guruşu zevcem müşteriye-i mezbûre bana def‘ ü teslîm, ben dahi yedinden tamamen ahz ü kabz ve umûruma sarfla istihlâk eyledim. Fîmâ-ba‘d eşyâ-yı muharrere-i mezkûre zevcem müvekkile-i mezbûre Zeliha Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ zevcem müvekkile-i mezbûre Zeliha Hatun ile ma‘an sâkin olduğum menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayrı nühâsiyenin mecmû‘u zevcem müvekkile-i mezbûre Zeliha Hatun’un malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 20 L sene [1]242. Şühûdü’l-hâl: Muhzır İsmail Çelebi, Kahveci Süleyman Ağa, Humbaracı Molla Abdullah, Muhzır İbrahim Çelebi.