Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 451 Hüküm no: 534 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Mustafa’nın küçük kızına babası tarafından nafaka tahsis edilmesi Sagīr nafakası Havâss-ı refî‘a kazâsına muzâfe Hasköy nâhiyesine tâbi‘ Sütlüce nâm mahâlde hasırcı Hoca Tekyesi civârında sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-vesîka Zeliha bt. Mustafa meclis-i şer‘-i şerîf-i enverde zevc-i sâbıkı Eyüb b. Yusuf mahzarında ikrâr-ı tam ve takrîr-i kelâm edip merkūm Eyüb ile zevciyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hacr ve terbiyemde olan tahmînen bir aylık sulbiye kızı Âişe nâm sagīrenin malı olmayıp ol-vechile nafakaya eşedd-i ihtiyâç ile muhtâce olmağla sagīre-i mezbûrenin nafaka ve kisve ve sâir levâzım-ı zarûriyesi için babası merkūm üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ [lehû] ve hüsnü-meâb efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi için babası merkūm Eyüb üzerine bi’t-terâzî târih-i vesîkadan beher mâh on beşer guruş farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Zeliha Hatun’a izin vermeğin mâ-vaka‘a [bi’t-taleb ketb olundu.] Fî 21 L sene [1]242. Şühûdü’l-hâl: Muhzır Emin Çelebi, Muhzır Ali Çelebi, Muhzır Mehmed Çelebi.