Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 452 Hüküm no: 535 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Hacı Ahmed’in vârislerinin miras hususunda Hacı Hafız Hasan Efendi’yi vekil tayin etmeleri İsbât-ı vekâlet Âsitâne-i aliyye ahâlisinden olup medîne-i İznikmid mahallâtından Akçamescid mahallesinde sâkin iken bundan akdem fevt olan Mehmed Efendi b. el-Hâc Ahmed b. Abdullah’ın verâseti medîne-i mezbûrede sâkinler zevce-i menkûha-i metrûkesi Hadice bt. Mehmed b. el-Hâc Ahmed ile sulbiye kebîre kızları Âişe ve Habibe’ye ve li-ebeveyn er karındaşı oğlu olup Âsitâne-i aliyye’de sâkin Mücellid Mehmed b. Hüseyin b. el-mezbûr el-Hâc Ahmed’e münhasıra ve mesele-i mîrâsları yirmi dört sehmden olup sihâm-ı [mezbûrdan] üç sehmi zevce-i mezbûre Hadice Hatun’a ve sekizer sehmden on altı sehmi kızları mezbûretân Âişe ve Habibe hatunlara ve bâkī beş sehmi karındaşı oğlu mezbûr Mehmed’e inhisârı tahakkukundan sonra mezbûrât Hadice ve Âişe ve Habibe hatunlar taraflarından ber-vech-i âtî vekâlet iddi‘â eden işbu bâ‘isü’l-vesîka el-Hâc Hafız Hasan Efendi b. Halil meclis-i şer‘-i şerîf-i enverde Mehmed Yazıcı b. Ali mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi b. el-Hâc Ahmed b. Abdullah’ın mezbûr Mehmed Yazıcı zimmetinde cihet-i karzdan yirmi dört guruş alacak hakkı olup meblağ-ı mezbûru merkūmdan kable’l-ahz ve’l-istifâ fevt ve meblağ-ı mezbûr yirmi dört guruş ile mahmiye-i İstanbul’da Bezzâzistân-ı atik kurbünde Yağlıkçılar sûkunda Yeşildirek karşısında vâki‘ Ayasofya-i kebîr Vakfı müstagallâtından şehriye yirmi akçe icâre ile bâ-temessük-i mütevellî hisse-i ma‘lûmeye mutasarrıf olduğu bir bâb yağlıkçı dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin nısfları dahi müteveffâ-yı mezbûrun hayatında ile’l-vefât yedinde mülk ve hakkı olup ba‘de vefâtihî ber-tashîh-i mezkûr veresesi mezbûrâta mevrûs ve dükkân-ı mezkûrda mutasarrıf olduğu hisse-i ma‘lûmesi dahi ancak kızları mezbûretâna âdiyen intikāl etmekle mezbûretân Hadice ve Âişe ve Habibe hatunlar meblağ-ı mezbûr yirmi dört guruşdan ber-tashîh-i mezkûr hisse-i irsiyelerine isâbet eden on dokuz guruşu merkūm Mehmed Yazıcı’dan taleb ve da‘vâ ve ahz ü kabza ve nısf âlât-ı mezkûreden kezâlik ber-i‘tibâr-ı mezkûr irsen mâlik oldukları on dokuz sehm hisse-i şâyi‘alarını bâ-izn-i şerîk semen-i misliyle âhara bey‘e ve kabz-ı semene ve mezbûretân Âişe ve Habibe hatunlar dahi dükkân-ı mezkûrda âdiyen kendülere intikāl eden hisse-i ma‘lûmelerini bedel-i misliyle âhara ferâğa ve kabz-ı bedele ve makbûzunu kendülere îsâl ve teslîme ve husûs-ı mezkûr mütevakkıf olduğu umûrun küllîsine bundan akdem zikr olunan Akçamescid mahallesinde beni taraflarından vekîl nasb ü ta‘yîn eylediklerinde, ben dahi vekâlet-i mezkûreyi kabûl etmemle meblağ-ı mezbûr on dokuz guruşu merkūm Mehmed Yazıcı’dan vekâlet-i mahkiyem hasebiyle taleb ederim, suâl olunsun dedikde gıbbe’s-suâl, mezbûr Mehmed Yazıcı dahi cevâbında meblağ-ı mezbûr yirmi dört guruş zimmetinde hayatında müteveffâ-yı mezbûr Mehmed Efendi’ye deyni olduğunu ve ba‘de vefâtihî verese-i mezbûrâta mevrûs olduğunu ikrâr, lâkin müdde‘î-i merkūmun ber-vech-i muharrer vekâlet müdde‘âsı ma‘lûmum değildir deyü inkâr edicek müdde‘î-i merkūmdan ber-vech-i muharrer müdde‘âsına mutâbık beyyine taleb olundukda ahrâr-ı ricâl-i Müslimînden ve medîne-i mezbûre ahâlisinden olup bu def‘a li-ecli’l-maslaha Âsitâne-i aliyye’ye gelen es-Seyyid Hüseyin b. Mehmed ve Zeynelabidin b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûrun mezbûr Mehmed Yazıcı zimmetinde hayatında cihet-i karzdan yirmi dört guruş alacak hakkı olup meblağ-ı mezbûru kable’l-ahz ve’l-istifâ ve meblağ-ı mezbûr zevcesi mezbûre Hadice Hatun ile kızları mezbûretân Âişe ve Habibe hatunlara ve karındaşı oğlu Mehmed’e mevrûs ve Âsitâne-i aliyye’de Bezzâzistân-ı atik kurbünde Yağlıkçılar sûkunda Yeşildirek karşısında vâki‘ Ayasofya-i kebîr Vakfı müstagallâtından şehriye yirmi akçe icâre ile bir bâb dükkânın hisse-i ma‘lûmesi müteveffâ-yı mezbûrun bâ-temessük-i mütevellî taht-ı tasarrufunda ve derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin nısfları müteveffâ-yı mezbûrun yedinde emvâli olup ba‘de vefâtihî âlât-ı muharrere-i mezkûrede mâlik olduğu hissesi mezbûre Hadice ve Âişe ve Habibe ve mezbûr Mehmed’e mevrûs ve zikr olunan dükkânda olan hissesi dahi ancak kızları mezbûretâna âdiyen intikāl etmekle zâtları rü’yetimiz ile ma‘lûmumuz olan zevce-i mezbûre Hadice bt. Mehmed b. el-Hâc Ahmed ile kızları mezbûretân Âişe ve Habibe bintey Mehmed b. el-Hâc Ahmed meblağ-ı mezbûrdan hisselerini mezbûr Mehmed Yazıcı’dan taleb ve da‘vâ ve ahz ü kabza ve âlât-ı lâzıme-i ma‘lûmede [olan] hisselerini dahi semen-i misliyle âhara bey‘e ve kızları mezbûretân Âişe ve Habibe hatunlar dahi dükkân-ı mezkûrda mutasarrıf oldukları hisselerini bedel-i misliyle âhara ferâğa ve kabz-ı bedele ve makbûzunu kendülere îsâl ve teslîme ve husûs-ı mezkûr mütevakkıf olduğu [83b] umûrun küllîsine taraflarından bundan akdem medîne-i İznikmid’de Akçamescid mahallesinde bizim huzûrumuzda işbu müdde‘î-i merkūmu vekîl nasb ü ta‘yîn eylediklerinde ol dahi ber-vech-i muharrer vekâlet-i mezkûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri müttefikü’l-lafz ve’l-ma‘nâ edâ-yı şehâdet-i şer‘iye eylediklerinde, gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a [bi’t-taleb ketb olundu.] Fî 20 L sene [1]242. Şühûdü’l-hâl: Muhzır Ebûbekir Çelebi, Debbâğ Molla Mustafa, Muhzır Ali Çelebi, Muhzır İsmail Çelebi.