Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 454 Hüküm no: 536 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divan-ı hümayun hâcegânından Necib Efendi’nin hamam, su hazinesi ve menzil hisselerini bey bi’l-vefa suretiyle satması Menzil, bey‘ bi’l-vefâ 20000 guruş Mahmiye-i İstanbul’da Saray-ı atik-i ma‘mûre kurbünde Mollagürânî mahallesinde sâkin Mektûbî-i Sadr-ı âlî Kalemi hulefâsından ve Hâcegân-ı Dîvân-ı Hümâyûn’dan Mustafa Necib Efendi b. Mehmed Efendi meclis-i şer‘-i şerîf-i enverde işbu bâ‘isetü’l-vesîka Safiye Hanım bt. Ebûbekir Paşa tarafından husûs-ı âtîde tasdîka vekîl-i şer‘îsi müderrisîn-i kirâmdan Mehmed Emin Âsaf Efendi mahzarında ikrâr-ı tam ve takrîr-i kelâm edip mahalle-i mezbûrede vâki‘ bir tarafdan Mehmed Kethudâ Mektebi ve üç tarafdan tarîk-i âm ile mahdûd bir kârgîr hamam ve bir su hazînesi ve zîr-i zemîn mahzeni müştemil muhterik bir bâb menzil-i kebîr arsasının otuz sehm i‘tibârıyla dokuz sehmi mahalle-i Mollagürânî Vakfı’ndan iki kıt‘a mütevellî temessükü ile bi’l-icâreteyn taht-ı tasarrufumda ve mâ‘adâ yirmi bir sehm arsasının dahi ma‘lûmü’l-mikdârı senevî dört yüz akçe mukāta‘a-i kadîmelü ve mâ‘adâ arsası ile üzerinde mevcûde bi’l-cümle enkāz-ı ma‘lûme ve arsa-i mezkûra cârî kanavâtına teba‘iyetle mülk olan nısf masura mâ-i lezîz akd-i âti’z-zikrin sudûruna değin bâ-hüccet-i şer‘iye yedimde mülküm olmağla ben ber-vech-i meşrûh mülk olan enkāz-ı merkūmu ve arsa-i mezbûru ve mâ-i lezîzi-i mezkûru târih-i vesîkadan altı ay tamamına değin redd-i mebî‘ ve kabz-ı semen etmek üzere müvekkile-i mûmâ-ileyhâ Safiye Hanım’a yirmi bin guruşa bi-tarîki’l-bey‘ bi’l-vefâ ve teslîm eylediğimde ol dahi ber-vech-i muharrer iştirâ ve tesellüm ve kabz ü kabûl ve meblağ-ı mezbûr yirmi bin guruşu müvekkile-i mûmâ-ileyhâ yedinden bi’t-tamam ahz ü kabz eyledim dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 25 L sene [1]242. Şühûdü’l-hâl: Muhzır Ebûbekir Çelebi, Muhzır Ali Çelebi, Muhzır Feyzullah Çelebi.