Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 455 Hüküm no: 538 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palazoğlu Haralam’ın Yazıcıoğlu Bedros’a olan borcunun vârisleri tarafından terekesinin satılarak ödenmesi Penbe İbrâsı Medîne-i Kayseriye’ye tâbi‘ Zencidere karyesi re‘âyâsından olup Trabzon’da hâlik olan Palazoğlu Haralam v. Sivadros zimmînin verâseti zevce-i metrûkesi Despino bt. Hüdaverdi ile babası mersûm Sivadros v. Adam zimmîye inhisârı tahakkukundan sonra mersûmân Despino ve Sivadros zimmîler taraflarından bir kıt‘a isbât-ı vekâlet hücceti nâtıka olduğu üzere meclis-i hükümde bulunan İsmail b. Osman ve Ali b. Cafer şehâdetleriyle sâbit olan Mıgırdıç v. Bogos zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Manuk v. Bogos zimmî muvâcehesinde bi’l-vekâle ikrâr-ı tam ve takrîr-i kelâm edip müvekkillerim mersûmânın mûrisleri hâlik-i mersûm Haralam zimmînin dâyini olup medîne-i mezbûrede mütemekkin Yazıcıoğlu Bedros zimmîye sağlığında zimmetinde bâ-temessük dört bin yüzyirmi guruş deyni olmağla hâlik-i mersûmun malı olup gāib ani’l-meclis Poladoğlu Yuvan zimmînin yed ve hıfzında olup benim gāib ani’l-meclis Poladoğlu Yuvan zimmîden makbûzum olan on dört çuval bin yirmi üç vakıyye penbenin otuz beş vakıyye darası ba‘de’l-ihrâç bâkī kalan dokuz yüz seksen sekiz vakıyye penbenin beher kantarı yüz elli beş guruşa olmak üzere cem‘an üç bin dört yüz seksen guruşa mersûm Manuk zimmîye bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç bin dört yüz seksen guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim. Fîmâ-ba‘d sâlifü’l-beyân penbe mersûm Manuk zimmînin mâl-ı müşterâsı ve hakk-ı sırfı olup müvekkillerim mersûmânın kat‘a alâka ve medhalleri kalmamağla semen-i mezkûrdan zikr olunan penbeyi gāib-i mersûmdan kabz ve bu âna dek masrûfum olan iki yüz yirmi beş guruşu ba‘de’t-tenzîl bâkīsi olan üç bin iki yüz elli beş guruşu zikri mürûr eden yedimde olan bir kıt‘a isbât-ı vekâlet hüccetinde tahrîr olunduğu vech üzere müvekkillerim mersûmânın emirlerine binâen Hafız Ali Paşa hazretlerinin tatarlarından Mehmed Tatar yediyle hâlik-i mersûmun dâyini mersûm Yazıcıoğlu Bedros zimmîye irsâl ve teslîm edip mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 12 L sene [1]242 Şühûdü’l-hâl: Muhzır Ebûbekir Çelebi, Hasan Ağa b. Osman, el-Hâc Ali Ağa b. Ebâbekir, Muhzır Abdulfettah Çelebi.