Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 456 Hüküm no: 539 Orijinal metin no: [83b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikagos’un Anparson’da olan alacağının kardeşi tarafından tahsil edilmesi 3400 guruş, ahz [ü] kabz, ibrâ Vilâyet-i Anadolu’da Bayburt kazâsı re‘âyâsından olup mahmiye-i İstanbul’da Süleyman Paşa Hanı’nda mütemekkin iken bundan akdem hâlik olan Rençber Nikagos v. Manuk zimmînin li-ebeveyn er karındaşı ve hasran vârisi olduğu bi’l-ihbâr zâhir olan Kiragos zimmî meclis-i şer‘-i hatîr-i lâzımü’t-tevkīrde hâlik-i mersûmun sağlığında vasiyet-i mu‘ayyene ve gayr-ı mu‘ayyenesini tenfîze vasîyy-i muhtârı işbu hâmilü’r-rakīm Anparson v. Minas zimmî muvâcehesinde bi’l-verâse ikrâr-ı tam ve takrîr-i kelâm edip mûrisim karındaşım mersûm sağlığında malından üç bin altı yüz guruş ifrâz ve âhara idâne etmek üzere mersûm Anparson zimmîye bi’l-emâne teslîm, ol dahi ba‘de’l-kabz meblağ-ı mezbûru âhara idâne ve fâizini mûrisim hâlik-i mersûm müddet-i ma‘lûme kabz ettikden sonra mûrisim hâlik-i mersûm ben bi-emrillâhi te‘âlâ hâlik olduğumda meblağ-ı mezbûr üç bin altı yüz guruşun sülüsünden beş yüz guruş manastır fukarâsına verile deyü vasiyet ve tenfîzine mersûm Anparson zimmîyi vasîyy-i muhtâr nasb ü ta‘yîn eylediğinde, ol dahi vesâyet-i mezkûreyi kabûl etmekle meblağ-ı mezbûr üç bin altı yüz guruşun sülüsünden beşyüz guruşu manastır [84a] fukarâlarına tasadduk etmekle bâkīsi olan üç bin yüz guruşu bana def‘ ü teslîm, ben dahi yedinden tamamen ahz ü kabz edip min-ba‘d meblağ-ı mecmû‘-ı mezbûr üç bin altı yüz guruşdan mersûm Anparsom zimmînin yed ve zimmetinde bir akçe ve bir habbe bâkī kalmamağla hukūk-ı mîrâsa ve sâire müte‘allika âmme-i da‘vâ ve mutâlebât ve kâffe-i eymân ve muhâsamâtdan mersûm Anparson zimmînin zimmetini ibrâ-yı âmm-ı sahîh-i şer‘î ile bi’l-verâse ibrâ ve iskāt eylediğimde, ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 19 L sene [1]242. Şühûdü’l-hâl: Muhzır Ali Çelebi, Muhzır İsmail Çelebi.