Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 457 Hüküm no: 540 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın Mehmed Tahir Ağa’dan aldığı borç karşılığında arsa ve bezci dükkânı gediğini rehin vermesi 3600 guruş idâne, rehin hücceti Mahmiye-i İstanbul’da Çatladıkapı kurbünde sâkin Hüseyin Ağa b. Ahmed meclis-i şer‘-i şerîf-i enverde yeğeni işbu bâ‘isü’l-vesîka Mehmed Tâhir Ağa b. Ömer tarafından husûs-ı âti’l-beyânda tasdîka vekîl-i şer‘îsi Hüseyin Ağa b. Halil mahzarında ikrâr-ı tam ve takrîr-i kelâm edip müvekkil-i merkūm Mehmed Tâhir Ağa bana malından üç bin altı yüz guruş ikrâz ve teslîm, ben dahi yedinden iktirâz ve kabz etmemle meblağ-ı mezbûr üç bin altı yüz guruşun bin altı yüz guruşu mukābelesinde mahmiye-i mezbûrede Kaliçeci Hasan mahallesinde vâki‘ ma‘lûmü’l-hudûd terbî‘an üç yüz altmış zirâ‘ muhterik mülk menzil arsamı ve iki bin guruş mukābelesinde kezâlik mahmiye-i mezbûrede Mahmud Paşa-yı Veli civârında kâğıdcılar kurbünde hallâc ve terzi dükkânları beynlerinde kâin bir bâb bezci dükkânı derûnunda mevcûde beyne’l-esnâf gedik ta‘bîr olunur bir nesciye? ve bir endâze ve bir akçe tahtası ve bir minderi müvekkil-i merkūm Mehmed Tâhir Ağa’ya rehin vaz‘ ü teslîm eylediğimde ol dahi ber-vech-i muharrer irtihân ve kabz ü kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 19 L sene [1]242. Şühûdü’l-hâl: Muhzır Emin Çelebi, Muhzır Ali Çelebi, Muhzır Mehmed Çelebi.