Bab Mahkemesi 54 Numaralı Sicil (H. 1102 / M. 1691) cilt: 20, sayfa: 154 Hüküm no: 152 Orijinal metin no: [24b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kırımlı Rukiye bt. Eyüb ile Seyyid İsmail b. Yusuf’ın boşanması Mahmiye-i İstanbul’da Atmeydanı kurbunda Suhte Sinan mahallesinde sâkine Kırımlı Rukiye bt. Eyüb nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i dâhili işbu bâ‘isü’l-kitâb es-Seyyid İsmail b. Yusuf mahzarında ikrâr-ı tâm ve takrîr-i kelâm [edip], mezbûr es-Seyyid İsmail ile beynimizde hüsn-i zindegânî olmamağla, zimmetinde mütekarrir ve ma‘kūdun aleyh olan seksen guruş mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre, zevcim mezbûr es-Seyyid İsmail ile muhâla‘a-i sahîha-i şer‘iyye ile muhâla‘a olup, ol dahi hul‘-ı mezbûru kabûl ettiğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ve’l-ibtiğā ketb ve imlâ olundu. Fi’l-yevmi’l-hâmis min Cumâdelâhire sene 1102. Şuhûdü’l-hâl: Mehmed Efendi b. Abdi, Abdullah b. Hasan, Hüseyin b. Musli, Hüseyin b. Abdi, Hüseyin b. Ali, Süleyman b. Mustafa, Mustafa b. Mehmed.