Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 458 Hüküm no: 542 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolancıoğlu Canik’in İngiltere tüccarı Abraham aleyhindeki alacak davasından vekili vasıtasıyla vazgeçmesi Husûs ile ibrâ Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbul’da Sorguçcu Hanı’nda vâki‘ odaya varıp zeyl-i rakīmde muharrerü’l-esâmî Müslimîn huzûrlarında akd-i meclis-i şer‘-i âlî ettikde Havâss-ı refî‘a kazâsına muzâfe kasaba-i Hasköy’de mütemekkin Kolancıoğlu Canik v. Oseb zimmînin karındaşı ve tarafından husûs-ı âti’l-beyânda vekîl olduğu Mardıros v. Devlet ve diğer Mardıros v. Artin nâm zimmîler şehâdetleriyle sâbit olan Agob evlâd-ı Oseb zimmî meclis-i ma‘kūd-ı mezkûrda işbu hâmilü’r-rakīm İngiltereli Abraham v. İstefan nâm tâcir muvâcehesinde bi’l-vekâle ikrâr-ı tam ve takrîr-i kelâm edip müvekkilim karındaşım mersûm Canik zimmî mersûm Abraham tâcire ücret kavlinsiz on sene dellâllıkda hizmet etmemle müddet-i mezkûrede eylediğim hizmetim için müstahık olduğum ecr-i mislimden ve müddet-i mezkûrede beynimizde cereyân eden ahz u i‘tâdan mersûm Abraham nâm tâcir zimmetinde seksen bin guruşdan mütecâviz hakkım terâküm etmekle meblağ-ı mezbûru mersûmdan taleb ederim deyü bundan akdem da‘vâya tasaddî etmiş idi. Lâkin müvekkilim mersûmun tasaddî eylediği da‘vâsının kat‘a aslı olmamağla husûs-ı mezkûra ve sâir beynlerinde cereyân eden cemî‘ hukūk-ı şer‘iyeye müte‘allika âmme-i da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını kabûl edip eğer tarafından târih-i kitâba gelince müvekkilim mersûmun mersûm Abraham ile beynlerinde cereyân eden ahz ü i‘tâya müte‘allika temessükât ve senedât-ı sâire zuhûr eder ise kat‘a amel ve i‘tibâr olunmasın dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 27 L sene [1]242. Şühûdü’l-hâl: Çukadâr Mustafa Ağa, Muhzır Mehmed Çelebi, Muhzır Feyzullah Çelebi.