Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 459 Hüküm no: 543 Orijinal metin no: [84a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İngiltere tüccarından Alanson’un Kolancıoğlu Canik’de olan alacağının taksitlendirilmesi Husûs ile tecîl, 1800 guruş ibrâ Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbul’da Çarşı-yı kebîrde Sorguçcu Hanı’nda vâki‘ odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde İngiltere tüccârından olup mahrûse-i Galata’da mütemekkin Alanson v. Corci nâm müstemen tarafından husûs-ı âti’l-beyânda vekîl olduğu Artin v. Ohannes ve Aleksan v. Ohannes zimmîler şehâdetleriyle sâbit olan Tercüman Vud? v. Corci meclis-i ma‘kūd-ı mezkûrda işbu hâmilü’r-rakīm Kolancıoğlu Canik v. Oseb zimmînin karındaşı ve tarafından kezâlik husûs-ı âti’l-beyânda tasdîka vekîl-i şer‘îsi Agob evlâd-ı Oseb zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilim mersûm Alanson’un mersûm Canik zimmî ile beynlerinde on sene bey‘ ü şirâ ve ahz ü i‘tâ cereyân edip el-hâletü hâzihî beynlerinde cereyân eden cemî‘ bey‘ ü şirâ ve ahz ü i‘tânın hesâbını şühûd muvâcehelerinde sehv ü galatdan ârî yegân yegân rü’yet eylediklerinde müvekkilim mersûmun mersûm Canik zimmî zimmetinde kırk bir bin guruş alacağı zuhûr etmekle mersûm Canik zimmî deyni olan meblağ-ı mezbûrun on yedi bin guruşunu işbu bir kıt‘a mübâya‘a hücceti nâtıka olduğu üzere ve altı bin guruşu dahi nakden edâ ve teslîm etmekle bâkīsi olan on sekiz bin guruşu dahi mersûm Canik’in zimmetini hâlen ve def‘aten müvekkilim mersûma edâya iktidârı olmamağla tecîle tâlib oldukda ol dahi meblağ-ı bâkī-i mezbûru târih-i hüccetden altı ay mürûrundan sonra beher mâh beşyüz guruş verip târih-i mezkûrdan otuz altı ay mürûrunda müvekkilim mezbûra tamamen edâ ve îfâ etmek üzere mersûm Canik zimmîyi bi’l-vekâle te’cîl ve taksîte müvekkilim mersûmun alacağı olan meblağ-ı bâkī-i müeccel-i mezbûr on sekiz bin [84b] guruşdan mâ‘adâ müddet-i mezkûrede beynlerinde cereyân eden cemî‘-i ahz ü i‘tâ ve mu‘âmelât-ı şettâ ve hukūk-ı sâire-i şer‘iyeye müte‘allika âmme-i da‘vâ ve mutâlebât ve kâffe-i eymân ve muhâsamâtdan mersûm Canik zimmînin zimmetini ibrâ-yı âmm-ı sahîh-i şer‘î ile bi’l-vekâle ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl edip eğer işbu târih-i vesîkaya gelince tarafından temessükât ve senedât zuhûr eder ise kat‘a amel ve i‘tibâr olunmasın dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 28 L sene [1]242. Şühûdü’l-hâl: Çukadâr Mustafa Ağa, Muhzır Mehmed Çelebi, Muhzır Feyzullah Çelebi.