Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 460 Hüküm no: 544 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma Hatun’un kardeşi Seyyid Ahmed Ağa’ya borcu olduğunu ikrar etmesi Husûs ile ikrâr-ı deyn 4125 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Mevlana es-Seyyid Numan Efendi mahmiye-i İstanbul’da Tarakçılar Çarşısı kurbünde Dâyehatun mahallesinde vâki‘ es-Seyyid Ahmed Ağa b. es-Seyyid Abdulkadir’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde merkūm es-Seyyid Ahmed Ağa’nın kız karındaşı olup menzil-i mezkûrda misâfireten sâkine ve zâtı Müslimûn-ı merkūmûn ta‘rîfleriyle mu‘arrefe olan Şerife Esma Hatun bt. el-mezbûr es-Seyyid Abdulkadir meclis-i ma‘kūd-ı mezkûrda işbu bâ‘isü’l-vesîka merkūm es-Seyyid Ahmed Ağa mahzarında ikrâr-ı tam ve takrîr-i kelâm edip ben bundan akdem karındaşım merkūmun malından ceste ceste dört yüz yirmi beş guruş ikrâz ve kabz ve umûruma sarfla istihlâk edip ol-vechile meblağ-ı mezbûr dört bin yüz yirmi beş guruş zimmetimde karındaşım merkūm es-Seyyid Ahmed Ağa’ya vâcibü’l-edâ ve lâzımü’l-kazâ sahîhan deynimdir dedikde, gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 26 L sene [1]242. Şühûdü’l-hâl: el-Hâc Mehmed Efendi b. İbrahim, Mehmed Emin b. Ahmed, es-Seyyid Abdülgani Ağa b. es-Seyyid Osman, Mehmed Ağa b. Mahmud, Mehmed Çelebi el-muhzır, Muhzır Feyzullah Çelebi.