Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 460 Hüküm no: 545 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Dâyehatun mahallesindeki menzil hissesini üvey kızı Zahide’ye satması Husûs ile 1000 guruş menzil Husûs-ı âti’l-beyânın mahâllinde ketb ü tahrîri için savb-ı şer‘-i enverde bi’l-iltimâs irsâl olunan Kâtib es-Seyyid Ahmed Faiz Efendi mahmiye-i İstanbul’da Tarakçılar kurbünde Dâyehatun mahallesinde vâki‘ Mehmed Ağa b. Mehmed’in sâkin olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde merkūm Mehmed Ağa meclis-i ma‘kūd-ı mezkûrda üvey kızı olup menzil-i mezkûrda sâkine ve zâtı Müslimûn-ı merkūmûn ta‘rîfleriyle mu‘arrefe olan işbu bâ‘isetü’l-vesîka Zahide bt. Mehmed Necib nâm hatun mahzarında ikrâr-ı tam ve takrîr-i kelâm edip zikr olunan Dâyehatun mahallesinde vâki‘ bir tarafdan Tahta Han ve bir tarafdan müşteriye-i mezbûre menzili ve bir tarafdan Çengelli Han ve taraf-ı râbi‘i tarîk-i âm ile mahdûd tahtında dört bâb dükkânı müştemil bir bâb mülk menzil, dört sehm i‘tibârıyla bir sehmi benim ve üç sehmi mezbûre Zahide Hatun’un yedimizde mülkümüz olmağla ben menzil-i mahdûd-ı mezkûrda ber-vech-i muharrer mâlik olduğum bir sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Zahide Hatun’a bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin guruşu üveyi kızım mezbûre Zahide Hatun bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d menzil-i mahdûd-ı mezkûrun mecmû‘u mezbûre Zahide Hatun’un mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 26 L sene [1]242. Şühûdü’l-hâl: Ali Ağa b. Hüseyin, es-Seyyid Mehmed Ağa b. Mehmed, es-Seyyid Ahmed Ağa b. es-Seyyid Abdulkadir, Mehmed Şakir Efendi b. Mustafa Muhzır Mehmed Çelebi, Çukadâr Mustafa.