Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 461 Hüküm no: 546 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolancıoğlu Canik’in ve kardeşi Agob’un bezzaz dükkânı eşyalarını satmaları ve bedelinden borçlarının karşılanması Husûs ile nısf gedik, 17000 guruş Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbu[l’da] Sorguçcular Hanı’nda vâki‘ odaya varıp zeyl-i rakīmde muharrerü’l-esâmî Müslimîn huzûrlarında akd-i meclis-i şer‘-i âlî ettikde havâss-ı refî‘a kazâsına muzâfe kasaba-i Hasköy’de mütemekkin kendinden asıl ve karındaşı Kolancıoğlu Canik v. Oseb zimmî tarafından husûs-ı âti’l-beyânda vekîl olduğu Mardıros v. Devlet ve diğer Mardıros v. Artin zimmîler şehâdetleriyle sâbit olan Agob evlâd-ı Oseb zimmî meclis-i ma‘kūd-ı mezkûrda İngiltere tüccârından Alanson v. Corci ve Maryem bt. Zahra Nasrâniye taraflarından kezâlik husûs-ı âti’l-beyânda vekîl olduğu mersûme Maryem Nasrâniyenin şahsını bilir Artin v. Ohannes ve Aleksan v. Ohannes zimmîler şehâdetleriyle sâbit olan Tercüman Vud v. Corci muvâcehesinde bi’l-asâle ve bi’l-vekâle ikrâr-ı tam ve takrîr-i kelâm edip mahmiye-i İstanbul’da Bezzâzistân-ı atik kurbünde Sofçular Hanı sûkunda Bezzâz Ali Efendi ve Kristosder? dükkânları beynlerinde kâin iki kepenk bir bâb bezzâz dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin nısfları benim ve nısf-ı âharları karındaşım müvekkilim mersûm Canik zimmînin yedimizde emvâlimiz olmağla ben âlât-ı muharrere-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müvekkile-i mersûme Maryem Nasrâriyeye bi’l-asâle ve bi’l-vekâle on yedi bin guruşa bey‘ ü temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ü kabûl eyledikdensonra karındaşım müvekkilim mersûmun müvekkil-i mersûm Alanson’a zimmetinde malından ve yedinden iştirâ ve kabz eylediği İngiltere metâ‘ı semeninden ba‘de külli’l-hesâb sahhu’l-bâkī kırk bir bin guruş deyni olmağla semeni olan meblağ-ı mezbûr on yedi bin guruşu karındaşım müvekkilim mersûm Canik zimmînin müvekkil-i mersûm Alanson’a deyni olan meblağ-ı mezbûr kırk bir bin guruşun on yedi bin guruşu için benim icâzetimle vekîl-i mersûm Vud müvekkili mersûm Alanson’a def‘ ü teslîm, ol dahi ahz ü kabz edip ol-vechile âlât-ı muharrere-i mezkûre mersûme Maryem Nasrâniyenin emvâl-i müşterâsı ve hakk-ı sırfı olup benim ve karındaşım müvekkilim mersûmun kat‘a alâka ve medhalimiz kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde mukırr-ı mersûmu vekîl-i mersûm Vud cemî‘ kelimât-ı meşrûhasında tasdîk ve tahkīk ve semen-i mezkûr on yedi bin guruşu mersûm Canik zimmînin deyni için müvekkil-i mersûm Alanson’a teslîmini bi-tamamihi ikrâr ü i‘tirâf eylediğini mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu] Fî 27 L sene [1]242. Şühûdü’l-hâl: Mehmed Çelebi b. Osman, Çukadâr Mustafa Ağa, Feyzullah Çelebi b. Osman.