Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 462 Hüküm no: 547 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin Efendi’nin menzil ve müştemilatını satması Menzil, 15000 guruş Medîne-i Kayseriye ahâlisinden olup mahmiye-i İstanbul’da Emir Buhârî Tekyesinde misâfiren sâkin es-Seyyid Hüseyin Efendi b. es-Seyyid Osman meclis-i şer‘-i hatîr-i lâzımü’t-tevkīrde yine medîne-i mezbûre re‘âyâsından işbu hâmilü’r-rakīm Beyleroğlu Makdisi Karabet v. Melkon zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup medîne-i mezbûre mahallâtından Mükerremîn mahallesinde vâki‘ bir tarafdan el-Hâc Ali oğlu el-Hâc Ali Efendi menzili ve bir tarafdan Yusuf Beşe oğlu Çopur menzili ve bir tarafdan Çiftçi İsa menzili ve bir tarafdan tarîk-i âm ile mahdûd bir tohar? ve bir sofa ve zîr-i zemîn ve bir harem odası ve bir kîlâr ve bir hazîne odası ve bir tennûr evi ve bir samanhâne ve bir kebîr oda ve bir ahır ve bir atlık ve bir mağaza ve bir aşhâne ve bir harem köşkü ve bir mağaza ve bir mikdâr havlu ve sokak kapısını müştemil mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Karabet zimmîye on beş bin guruşa bey‘ ve temlik ve mahâllinde zabta tarafımdan mersûmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr on beş bin guruşu müşteri-yi mersûm bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d menzil-i mahdûd cemî‘ müştemilâtıyla mersûm Karabet zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 25 L sene [1]242. Şühûdü’l-hâl: Kesili? Emir Mehmed Ağa, Kayseriyeli Kedicioğlu Memiş Ağa, Muhzır Ebûbekir Çelebi, Mehmed Ağa b. Ömer, Şerbetçioğlu Halil Ağa, Hacı Ömer oğlu Mehmed Ağa, Vekesili? Emir Ağa, Muhzır Ali Çelebi, Talaslı Mehmed Ağa b. Ebâbekir, es-Seyyid İbrahim Ağa b. el-Hâc Yusuf, Tolosanlı Sıvacı Abdulkadir, Muhzır Fettah Çelebi.