Bab Mahkemesi 54 Numaralı Sicil (H. 1102 / M. 1691) cilt: 20, sayfa: 155 Hüküm no: 153 Orijinal metin no: [24b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Mehmed ile eski kocası Ahmed Çelebi b. Rezzak’ın birbirlerinin zimmetini ibra etmesi Mahmiye-i İstanbul’da Akşemseddin mahallesi sâkinelerinden olup zâtını ma‘rifet-i şer‘iyye ile ârifân Yusuf Efendi b. Abdurrahman ve Mustafa Çelebi b. Mehmed ta‘rîfleriyle mu‘arrefe olan Rahime bt. Mehmed nâm hâtun meclis-i şer‘-i şerîf-i enverde, zevc-i mutallıkı işbu bâ‘isü’l-vesîka Ahmed Çelebi b. Rezzâk mahzarında ikrâr ve takrîr-i kelâm edip, mezkûr Ahmed Çelebi’den sende bir çuka ferrâce ve bir sîm kuşak ve sâir eşyâ-i ma‘lûmem kalmış idi deyu taleb ve da‘vâ eylediğimde ol dahi inkâr eylediğinden mâ‘adâ benim dahi sende bir Kelâmullâh ve bir Birgili risâlesi ve bir kebîr kum sâ‘ati ve bir fener ve sâir eşyâ-i ma‘lûmem kalmış idi demekle, beynimizde nizâ‘-ı küllî vukū‘undan sonra muslihûn tavassut edip, ben ferrâce ve kuşak ve sâir eşyâ-i ma‘lûme ve bi’l-cümle târih-i kitâba gelince hukūk-ı ma‘lûme ve mechûle-i zevciyyete müte‘allika âmme-i da‘vâdan mezbûr Ahmed’in zimmetini ibrâ-i âmm-ı râfi‘ü’l-hisâm ile ibrâ ve iskāt edip, ol dahi eşyâ-i mezkûre ve sâir hukūk-ı ma‘lûme ve mechûle ve bi’l-cümle târih-i kitâba gelince âmme-i da‘vâ ve muhâsamâtdan benim zimmetimi ibrâ-i âmm-ı kātı‘ü’n-nizâ‘la ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Cumâdelâhire sene 1102. Şuhûdü’l-hâl: Mustafa Efendi b. Mehmed, Yusuf Efendi b. Abdurrahman, Mustafa Çelebi b. Ömer, Mustafa Çelebi b. Mehmed, Mustafa Çelebi b. Mehmed, İbrahim Çelebi b. Ahmed, Ahmed Çelebi b. Ahmed.