Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 465 Hüküm no: 551 Orijinal metin no: [85a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici Artin’in eskici dükkânı eşyalarını Mehmed Salih’e satması Eskici Gediği, 700 guruş Mahmiye-i İstanbul’da Langa Yenikapısı hâricinde Yeni mahallede mütemekkin Eskici Artin v. İstefan zimmî meclis-i şer‘-i şerîf-i enverde işbu bâ‘isü’l-vesîka Tönbakücü Bağdâdî Mehmed Salih b. Mehmed mahzarında ikrâr-ı tam ve takrîr-i kelâm edip mahmiye-i mezbûrede Parmakkapı kurbünde Kerpiç Hanı’nda nerdubân tahtında vâki‘ sağ tarafdan ikinci bir bâb oda derûnunda mevcûde beyne’l-esnâf gedik ta‘bîr olunur işbu hâzır bi’l-meclis kayın atam Lağımcıoğlu Kirkor v. Bedros zimmîden müşterâ bâ-defter-i müfredât müstakılleten yedimde emvâlim olan eskici âlâtçı [gediğini] tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Salih’e yedi yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eylediğinden sonra semeni olan meblağ-ı mezbûr yedi yüz guruşu benim zimmetimde müşteri-yi merkūma cihet-i deyn-i şer‘îden bâ-i‘lâm-ı şer‘î mahkûmün-bih deynim olan yedi yüz guruşa takas ve mahsûb ve tarafeynden her birimiz mukāssa ve kabûl eyledik. Fîmâ-ba‘d âlât-ı muharrere-i mezkûre merkūm Mehmed Salih Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 26 L sene [1]242. Şühûdü’l-hâl: Bağdâdî Mehmed Salih, Ivaz Mehmed İzzet Ağa, Bağdâdî es-Seyyid Abbas, Hüseyin b. el-Hâc Mehmed, Mehmed Cevad b. Abdülkerim, Muhzır Emin Çelebi, Muhzır Fettah Çelebi.