Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 466 Hüküm no: 552 Orijinal metin no: [85a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimbeşeoğlu Seyyid İsmail’in harman yeri ve arazilerdeki hisselerinin bir kısmını satması Emlâk ferâğı, arâzi mübaya‘ası 200 guruş Vilâyet-i Anadolu’da Bolu sancağında Ulus kazâsında Alper Dîvânı ahâlisinden olup mahmiye-i İstanbul’da Acıçeşme kurbünde sâkin İbrahim Beşeoğlu es-Seyyid İsmail b. es-Seyyid Mehmed meclis-i şer‘-i şerîf-i enverde ammisi oğlu işbu bâ‘isü’l-vesîka Nalçacı es-Seyyid Hasan Ağa b. Halil mahzarında ikrâr-ı tam ve takrîr-i kelâm edip mârrü’z-zikr Alper Dîvânı’nda vâki‘ her biri ma‘lûmü’l-hudûd bir kıt‘a harman yeri ve bir samanhâne arsası ve ma‘lûmü’l-kıt‘a kürûmu mülk bağ ve eşcâr-ı müsmireli bahçeler altışar sehm i‘tibârıyla ikişer sehmi benim ve ikişer sehmi merkūm es-Seyyid Hasan Ağa’nın ve ikişer sehmi diğer Acemoğlu gāib ani’l-beled es-Seyyid Osman’ın bi’l-irsi’ş-şer‘î şâyi‘an yedlerimizde mülk ve hakkımız olmağla ben emlâk-ı muharrere-i mezkûrede ber-i‘tibâr-ı mezkûr mâlik olduğum ikişer sehm hisse-i şâyi‘amın bir sehmini yedimde ibkā ve mâ‘adâ birer sehm hisse-i şâyi‘a-i âharını [85b] tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid Hasan Ağa’ya yüz guruşa bey‘ ü temlik ve yine zikr olunan Alper Dîvânı’nda vâki‘ mevâzi‘-i adîdede kâin her biri ma‘lûmü’l-hudûd ve’l-kıt‘a tarla ve çayır yerleri kezâlik altışar sehm i‘tibârıyla ikişer sehmi benim ve ikişer sehmi müşteri-yi merkūm es-Seyyid Hasan Ağa’nın ve ikişer sehmi gāib-i merkūm es-Seyyid Osman’ın bâ tapu taht-ı tasarrufumuzda olmağla ben kezâlik arâzi ve çayır yerlerinde ber-i‘tibâr-ı mezkûr mutasarrıf olduğum ikişer sehm hissemin birer sehmini yedimde ibkā ve mâ‘adâ birer sehm hisse-i âharını müşteri-yi merkūm es-Seyyid Hasan Ağa’ya yüz guruş bedel mukābelesinde bâ-ma‘rifet-i sâhib-i arz ferâğ ve tefvîz ve her birerlerini mahâllinde vech-i lâyıkı üzere zabta tarafımdan müşteri-yi merkūmu taslît eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen ve bedel cem‘an iki yüz guruşu müşteri-yi merkūm yedinden tamamen ahz ü kabz eyledim. Min-ba‘d emlâk-ı muharrere-i mezkûrenin ber-i‘tibâr-ı mezkûr birer sehmi merkūm es-Seyyid Hasan Ağa’nın emlâk-ı müşterâsı ve mârrü’z-zikr arâzi ve çayır yerlerinin dahi kezâlik birer sehmi dâhil-i havza-i tasarrufu olup benim kat‘a birer sehminde alâka ve medhalim kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 26 L sene [1]242. Şühûdü’l-hâl: Nalçacı Halil Ağa b. Hasan, Nalçacı es-Seyyid Ali b. Ali, Nalçacı es-Seyyid Hasan b. es-Seyyid Mustafa, Gülhâne Bekçisi Canbak Hasan Ağa, Feyzullah Çelebi, Yedekçi İbrahim Ağa, Muhzır Abdulfettah Çelebi.