Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 470 Hüküm no: 556 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Binbaşı Seyyid İsmail Ağa’nın küçük kızına nafaka tahsis olunması Husûs ile takdîr-i nafaka 15 guruş Sâdır olan fermân-ı âlîye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden irsâl olunan mevlana es-Seyyid Numan Efendi devletlü inâyetlü Serasker Paşa hazretlerine mahsûs saraya varıp Asâkir-i Mansûre-i Muhammediye binbaşısı olup bundan akdem fevt olan es-Seyyid İsmail Ağa b. Ahmed’in sulbiye sagīre kızı Şerife Emine’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi işbu bâ‘isetü’l-vesîka zâtı mu‘arrefe Şerife Âdile bt. es-Seyyid Abdullah’ın talebiyle mevlana-yı merkūm sagīre-i mezbûrenin malı nemâsından işbu târih-i vesîkadan kadr-ı ma‘rûf idüğü ihbâr olunan beher şehr on beşer guruş nafaka ve kisve-bahâ farz ve takdîr buyurup meblağ-ı mefrûz-ı mezkûr beher şehr on beşer guruş sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve vakt-i hâcetde istidâneye ve inde’z-zafer sagīre-i mezbûreninmalı nemâsı rücû‘una vâlidesi vasîyy-i mezbûre Şerife Âdile Hatun’a izin verdiğini mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin ba‘de’t-tenfîz mâ-vaka‘a bi’t-taleb ketb olundu. Fî 22 L sene [1]242. Şühûdü’l-hâl: Mehmed Çelebi el-muhzır, Süleyman Ağa b. Mustafa, Mustafa Ağa b. Mustafa, Çukadâr Hüseyin Ağa.