Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 471 Hüküm no: 557 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Binbaşı Seyyid İsmail Ağa’nın küçük kızına annesi Şerife Adile’nin vasi tayin olunması Husûs ile vasî nasbı Sâdır olan fermân-ı âlîye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden irsâl olunan mevlana es-Seyyid Numan Efendi devletlü inâyetlü Serasker Paşa hazretlerine mahsûs Saray’a varıp Asâkir-i Mansûre-i Muhammediye’nin Başkâtibi Mehmed Yektâ Efendi’nin odasına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde Asâkir-i Mansûre-i Muhammediye binbaşısı olup bundan akdem fevt olan es-Seyyid İsmail Ağa b. Ahmed’in sulbiye sagīre kızı Şerife Emine’nin babasından müntakil malını hıfza ve umûrunu rü’yete vasî nasbından lâbüd olmağla sagīre-i mezbûrenin vâlidesi işbu bâ‘isetü’l-vesîka Şerife Âdile bt. es-Seyyid Abdullah her vechile mu‘temede ve müstakīme ve umûr-ı vesâyeti kemâ-yenbagī rü’yete kādire olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin vakt-i rüşd ve sedâdına değin malını hıfza ve umûrunu rü’yete vâlidesi mezbûre Şerife Âdile Hatun’ı vasî nasb ü ta‘yîn olundukda ol dahi vesâyet-i mezkûreyi kabûl ve hizmet-i lâzımesini edâya ta‘ahhüd eylediğini mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 20 L sene [1]242. Şühûdü’l-hâl: Muhzır Mehmed Çelebi, es-Seyyid Mustafa b. Mustafa, Süleyman b. Mustafa, Çukadâr Hüseyin Ağa.