Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 471 Hüküm no: 558 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Arif’in vefat eden annesi Rafia ve babası İsmail’den intikal eden miras hususunda Hüseyin b. Abdullah’ı vekil tayin etmesi Kabûlüne mevkūfe vekâlet Vilâyet-i Anadolu’da Ankara kazâsında Hacı İlyas mahallesinde sâkine iken bundan akdem fevt olan Rafia bt. Mustafa b. Abdullah’ın verâseti zevc-i metrûku İsmail b. Osman ile sadrî sagīr oğlu Mehmed Ârif’e münhasıra ba‘dehû ba‘de’l-kısme mezbûr İsmail dahi fevt olup verâseti sulbî kebîr oğulları mezbûr Mehmed Ârif ve Osman ve Mehmed ve mezbûre Sagīre kızları Rafia ve Dudu nâm hatunlara inhisârı tahakkukundan sonra mezbûr Mehmed Ârif meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vâlidem müteveffiye-i evvel-i mezbûrenin hîn-i vefâtında yanında mevcûde ma‘rifet-i şer‘le tahrîr ve bey‘ olunan terekesi esmânından bâ-defter-i kassâm benim hisse-i irsiyeme isâbet eden beş yüz elli guruşu ve babam müteveffâ-yı mezbûrun terekesinden dahi benim hisse-i irsiyeme isâbet eden hisse-i ma‘lûmemi mahâllinde vâzı‘ü’l-yed olanlardan taleb ve da‘vâ ve ahz ü kabza ve bana îsâl ve teslîme ve husûs-ı mezkûr mütevakkıf olduğu umûrun küllîsine kazâ-i mezbûrda sâkin ammim işbu bâ‘isü’l-vesîka Hüseyin b. Abdullah’ı kabûlüne mevkūfe tarafımdan vekîl ve nâib-i menâb nasb ü ta‘yîn eyledim dedikde mâ-vaka‘a bi’t-taleb ketb olundu. Fî 28 L sene [1]242. Şühûdü’l-hâl: Muhzır Emin Çelebi, Humbaracı Mehmed Salih b. el-Hâc Ahmed, Humbaracı Yusuf b. İbrahim, Mehmed Ali Çelebi, Humbaracı Mehmed b. Mustafa.