Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 472 Hüküm no: 559 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. İbrahim’in sahibi olduğu ev ve müştemilatını satması 2500 guruş menzil Mahrûse-i Galata’ya muzâfe kasaba-i Beşiktaş’da sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fatıma bt. İbrahim nâm hatun meclis-i şer‘-i şerîf-i enverde işbu bâ‘iseyü’l-vesîka kendinden asıl ve dâmâdı Mehmed Şakir Ağa b. Mustafa tarafından husûs-ı âti’l-beyânda tasdîka vekîl-i şer‘îsi Hüseyin Ağa b. Ali mahzarında ikrâr-ı tam ve takrîr-i kelâm edip akd-i âti’z-zikrin sudûruna değin müstakılleten yedimde mülk ve hakkım olup mahmiye-i İstanbul’da Mahmud Paşa-yı Veli kurbünde Servi sokağında vâki‘ bir tarafdan Perdeci Hüseyin Ağa arsası ve bir tarafdan Zenneci el-Hâc İbrahim Ağa arsası ve bir tarafdan Mehmed Necib Efendi arsası ve bir tarafdan tarîk-i hâs ile mahdûd tahtânî ve fevkānî iki bâb oda ve bir sofa ve tahtapûş ve iki kenîf ve bir bi’r-i mâ ve bir mikdâr havluyu müştemil bir bâb mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūmân Mehmed Şakir Ağa ve Hüseyin Ağa’ya ale’l-iştirâki’s-seviyy üç bin beş yüz guruşa bey‘ ü temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ü kabûl eylediklerinden sonra semeni olan meblağ-ı mezbûr üç bin beş yüz guruşu müşteriyân-ı merkūmân bana def‘ ü teslîm, ben dahi yedlerinden tamamen ahz ü kabz eyledim. Fîmâ-ba‘d menzil-i mahdûd-ı mezkûr merkūmân Mehmed Şakir Ağa ve Hüseyin Ağa’nın ale’l-iştirâki’s-seviyy mülk-i müşterâları ve hakk-ı sırfları olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz bi’l-asâle âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 L sene [1]242. Şühûdü’l-hâl: Muhzır Ebûbekir Çelebi, Berber Mehmed Ağa, Muhzır Ali Çelebi.