Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 473 Hüküm no: 560 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kurşuncu Ahmed Ağa’nın Sultan Bayezid-i Veli Vakfı’nda olan alacağının vârisleri tarafından tahsil olunması Kara Mustafa Paşa Vakfı’na dâir ibrâ Mahrûse-i Galata’ya muzâfe kasaba-i Beşiktaş mahallâtından Sinanpaşa mahallesinde sâkin iken bundan akdem fevt olan Sultan Bâyezid-i Velî Vakfı kurşuncusu Ahmed Ağa b. Mustafa’nın vârisi zevce-i menkûha-i metrûkesi Şerife Zeliha bt. İbrahim ile li-ebeveyn er karındaşı Mehmed’e münhasıra ve terekesinin rub‘u zevcesi mezbûreye ve bâkī sülüs esmânı karındaşı mezbûr Mehmed’e inhisârı tahakkukundan sonra müteveffâ-yı mezbûrun sülüs vasiyeti olmağla zâtı mu‘arrefe zevce-i mezbûre Zeliha Hatun asâleten ve karındaşı mezbûr Mehmed tarafından husûs-ı âti’l-beyânda vekîl olduğu Ali Efendi b. İbrahim ve Mustafa Ağa b. Abbas şehâdetleriyle sâbit olan es-Seyyid Mehmed Salih Ağa b. Mustafa vekâleten meclis-i şer‘-i şerîf-i enverde Kara Mustafa Paşa Vakfı mütevellîsi işbu bâ‘isü’l-vesîka Mehmed Said Efendi b. Mustafa mahzarında her biri bi’l-asâle ve bi’l-vekâle ikrâr-ı tam ve takrîr-i kelâm edip mezbûre Zeliha Hatun mûrisimiz müteveffâ-yı mezbûrun hayatında sülüs malından vasiyeti edâ ve tenfîzine beni vasîyy-i muhtâre nasb ü ta‘yîn etmekle müteveffâ-yı mezbûrun merkūm Mehmed Said Efendi zimmetinde hayatında mütüvellî-yi merkūmun emriyle vakf-ı mezbûrun türbe ve medresesinde kapladığı kurşun semeninden iki bin yüz seksen dört guruşdan bâkī bin yedi yüz altmış dokuz guruş alacak hakkı olup kable’l-ahz ve’l-istifâ fevt ve meblağ-ı bâkī-i mezbûr benimle sülüs vasiyeti ve karındaşı merkūma mevrûs olmağla meblağ-ı bâkī-i mezbûr bin yedi yüz altmış dokuz guruşun sülüsü olan beş yüz seksen dokuz guruş yirmi altı para ile bâkī kalan bin yüz yetmiş dokuz guruş on iki paradan benim ber-tashîh-i mezkûr hisse-i irsiyeme isâbet eden üç yüz doksan üç guruş dört para ki cem‘an dokuz yüz seksen iki guruş otuz parayı bana ve karındaşı müvekkil-i merkūmun ber-tashîh-i mezkûr hisse-i irsiyesine isâbet eden yedi yüz seksen altı guruş sekiz parayı müvekkil-i merkūm için vekîl-i merkūma mezbûr Mehmed Said Efendi tamamen edâ ve teslîm, biz dahi yedinden tamamen ahz ü kabz edip min-ba‘d meblağ-ı mecmû‘-ı mezbûrdan mütevellî-i merkūm Mehmed Said Efendi zimmetinde bir akçe ve bir habbe bâkī kalmamağla husûs-ı mezkûra ve hukūk-ı şer‘iyeye müte‘allika âmme-i da‘vâdan taraf-ı vakfı ve mütevellî-i merkūm Mehmed Said Efendi’nin zimmetini her birimiz bi’l-asâle ve bi’l-vesâye ve bi’l-vekâle ibrâ ve iskāt eylediğimizde ol dahi ibrâ-yı mezkûrumuzu kabûl eyledi dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 L sene [1]242. Şühûdü’l-hâl: Mehmed Necib Ağa b. Halil, Mustafa Ağa b. el-Hâc Hasan, Mustafa Ağa b. Abbas.