Bab Mahkemesi 54 Numaralı Sicil (H. 1102 / M. 1691) cilt: 20, sayfa: 155 Hüküm no: 154 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Hacı Ahmed’in varisleriyle Mustafa Çelebi’nin sulh olması Vilâyet-i Anadolu’da medîne-i Kastamonu’da Kırkçeşme mahallesinde sâkin iken bundan akdem vefât eden Mustafa Efendi b. el-Hâc Ahmed’in verâseti, zevcesi Belkıs nâm hâtun ile sulbiye kızı Râbia’ya ve li ebeveyn karındaşı oğlu el-Hâc Mehmed b. es-Seyyid Mehmed’e münhasıra olduğu mütehakkik* oldukdan sonra mezbûr el-Hâc Mehmed meclis-i şer‘-i şerîfde, medîne-i mezbûrda sâkin iken bundan akdem vefât eden el-Hâc b. Mustafa’nın sulbî oğlu ve hasran vârisi olan bâ‘isü hâze’l-kitâb Mustafa Çelebi nâm kimesne mahzarında ikrâr ve takrîr-i kelâm edip, mûrisim müteveffâ-yı mezbûr Mustafa Efendi’nin mezbûr el-Hâc zimmetinde cihet-i karzdan bin üç yüz guruş hakkı olup, kable’l-ahz ikisi dahi vefât etmeğin, meblağ-ı mezbûrun sekiz sehmden bana isâbet eden üç sehim hissemi terekesine vâzı‘u’l-yed olan oğlu mezbûr Mustafa Çelebi’den taleb ve da‘vâ eylediğimde, ol dahi edâdan imtinâ‘ etmeğin beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremden yüz elli guruş üzerine beynimizde inşâ-i akd eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr yüz elli guruşu mezbûr Mustafa Çelebi yedinden bi’t-tamâm ahz u kabz ettiğimden sonra husûs-ı mezbûra müte‘allika cemî‘ da‘vâdan mezbûr Mustafa Çelebi’nin zimmetini ibrâ ve iskāt eyledim dedikde, gıbbe’t-tasdîki’l-mer‘î mâ vaka‘a bi’t-taleb ketb ve imlâ olundu. Fi’l-yevmi’r-râbi‘ min Cumâdelâhire sene 1102. Şuhûdü’l-hâl: Mehmed b. Osman, Seyyid Mehmed b. Mahmud, Abdülbâki [b.] Mehmed, Yahya Çelebi b. Ahmed ve gayruhüm.