Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 474 Hüküm no: 561 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Mehmed’in eşi Mehmed İzzet Efendi’den boşanması Tatlîk Mahmiye-i İstanbul’da Deniz Abdal kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Habibe bt. Mehmed Emin nâm hatun meclis-i şer‘-i şerîf-i enverde işbu bâ‘isü’l-vesîka Mehmed İzzet Efendi b. Ahmed mahzarında ikrâr-ı tam ve takrîr-i kelâm edip merkūm Mehmed İzzet Efendi zevc-i dâhilim olup târih-i kitâbdan bir gün mukaddem beni tatlîk etmekle, zimmetinde mütekarrir ve ma‘kūdün-aleyh olan doksan bir guruş mehr-i müeccelim ile zevciyet beynimizde kāime iken malımdan ahz ve istihlâk eylediği bir elmaslı zihgir ve bir elmaslı iğne ve bir elmaslı halîkânın kıymetleri olan iki yüz guruş ki cem‘an ikiyüz doksan bir guruşu zevcim mezbûr işbu meclis-i şer‘de bana def‘ ü teslîm, ben dahi yedinden ahz ü kabz edip malım olup teslîmine müte‘ahhid olduğu iki nîmten semmûr kürk ve bir döşek ve iki baş yasdığı ve iki yüz yasdığı ve iki yorgan ma‘a çârşebden mâ‘adâ hukūk-ı zevciyete ve ibtidâ-yı zevciyetden işbu târih-i vesîkaya gelince sâir beynimizde cereyân eden cemî‘ hukūk-ı şer‘iyeye müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 L sene [1]242. Şühûdü’l-hâl: Muhzır Ebûbekir Çelebi, Muhzır Ali Çelebi, Muhzır Fettah Çelebi.