Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 474 Hüküm no: 562 Orijinal metin no: [86b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Vidin Kalesi muhafızı Binbaşı İsmail Ağa’nın terekesinin vârislerine teslim edilmesi Ahz [ü] kabz, 1000 guruş, bir aded şal. Sâdır olan fermân-ı âlîye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi devletlü inâyetlü Serasker Paşa kapısına varıp Asâkir-i Mansûre’nin Başkâtibi Mehmed Yekta Efendi’ye mahsûs odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde Asâkir-i Mansûre’nin binbaşısı olup Vidin Kal‘ası’na bâ-fermân ta‘yîn buyurulup kal‘a-i mezkûrda sâkin iken bundan akdem fevt olan İsmail Ağa b. Ahmed’in verâseti zevce-i menkûha-ı metrûkesi Şerife Âdile bt. es-Seyyid Abdullah ile sulbî kebîr oğlu es-Seyyid Ahmed’e ve tahmînen dört yaşında sulbiye kızı Şerife Emine’ye münhasıra ve mesele-i mîrâsları yirmi dört sehmden olup sihâm-ı mezbûreden üç sehmi zevcesi mezbûreye ve on dört sehmi oğlu mezbûra ve yedi sehmi kızı mezbûreye isâbeti tahakkukundan sonra mezbûr es-Seyyid Ahmed asâleten ve zevce-i mezbûre kendinden asâleten ve kızı sagīre-i mezbûrenin bâ-hüccet-i şer‘iye vasîyy-i mansûbesi olmağla vesâyeten meclis-i ma‘kūd-ı mezkûrda Asâkir-i Mansûre’nin emvâlini rü’yete memûr olan Başkâtib Mehmed Yekta Efendi mahzarında her biri bi’l-asâle ve bi’l-vesâye ikrâr-ı tam ve takrîr-i kelâm edip mûrisimiz müteveffâ-yı mezbûrun hîn-i vefâtında yanında mevcûde ve ma‘rifet-i [87a] şer‘le tahrîr ve bey‘ olunan terekesi esmânından ba‘de ihrâci’l-mesârifi’l-lâzıme ve’d-düyûn bâ-defter-i kassâm terekesini kabz ve veresesine îsâle kayyum nasb olunan Sağkol Ağası İbrahim Ağa’nın makbûzu olan bin guruş ile altı yüz guruş kıymetli bir köhne fermâyiş şalı efendi-yi mûmâ-ileyhe irsâl etmekle ol dahi ba‘de’l-kabz nakd-i merkūm ile sâlifü’l-beyân şalı bize def‘ ü teslîm biz dahi yedinden tamamen ahz ü kabz edip min-ba‘d bâ-defter-i tereke müteveffâ-yı mezbûrdan gerek İbrahim Ağa’nın ve gerek efendi-yi mûmâ-ileyh zimmetlerinde bir akçe ve bir habbe bâkī kalmamışdır dediklerinde, gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 20 L sene [1]242. Şühûdü’l-hâl: Çukadâr Mustafa Ağa, Süleyman Ağa b. Mustafa, Muhzır Ebûbekir Çelebi, Mustafa Ağa b. Mustafa, Muhzır Mehmed Çelebi.