Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 475 Hüküm no: 563 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adile bt. Seyyid Abdullah’ın, küçük kızının malından borç alması Vasi hücceti Sâdır olan fermân-ı âliye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Mevlana es-Seyyid Numan Efendi devletlü inâyetlü Serasker Paşa hazretlerine mahsûs Saraya varıp Asâkir-i Mansûre-i Muhammediye’nin Başkâtibi Mehmed Yekta Efendi’ye mahsûs odada zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde Asâkir-i mansûre-i Muhammediye binbaşısı olup Vidin Kal‘ası muhâfazasına memûren sâkin iken bundan akdem fevt olan İsmail Ağa b. Ahmed’in sagīre kızı Şerife Emine’nin vasîsi olup zâtı Müslimûn-ı merkūmûn ta‘rîfleriyle mu‘arrefe olan vâlidesi Şerife Âdile bt. es-Seyyid Abdullah nâm hatun meclis-i ma‘kūd-ı mezkûrda li-ecli’l-idâne vasî nasb ü ta‘yîn olunan es-Seyyid Mehmed Şakir Ağa b. Ali mahzarında ikrâr-ı tam ve takrîr-i kelâm edip mezbûr es-Seyyid Mehmed Şakir Ağa vasîsi olduğum kızım sagīre-i mezbûrenin malından bana bin altı yüz doksan iki guruş idâne ve teslîm, ben dahi yedinden istidâne ve kabz etmemle meblağ-ı mezbûr ile semeni târih-i kitâbdan üç sene müeccel ve mev‘ûd olmak üzere yine sagīre-i mezbûrenin malından vasîyy-i merkūm yedinden iştirâ ve kabz eylediğim bir hilâlî sâ‘at semeninden yedi yüz elli dokuz guruş ki cem‘an iki bin dört yüz elli bir guruş kızım sagīre-i mezbûreye zimmetimde vâcibü’l-edâ ve lâzımü’l-kazâ sahîhan deynimdir dedikde gıbbe’t-tasdîki’ş-şer‘î Terzi es-Seyyid Mustafa Ağa b. Mustafa ve Terzi Süleyman Ağa b. Hasan meclis-i ma‘kūd-ı mezkûrda vasîyy-i mezbûr es-Seyyid Mehmed Şakir Ağa mahzarında mukırra-i mezbûre Şerife Âdile Hatun’un kızı sagīre-i mezbûreye deyni olan meblağ-ı mecmû‘-ı mezbûr iki bin dört yüz elli bir guruşa tarafeynden bi’l-emr ve’l-kabûl her birimiz müte‘âkiben kefîl bi’l-mâl ve zâminiz dediklerinde vasîyy-i mezbûr es-Seyyid Mehmed Şakir Ağa kefâlet-i mezkûreleri kabûl eyledim dediğini mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 20 L sene [1]242. Şühûdü’l-hâl: Çukadâr Mustafa Ağa, Muhzır Mehmed Çelebi, Süleyman Ağa b. Mustafa, Muhzır Ebûbekir Çelebi, Mustafa Ağa b. Mustafa.