Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 476 Hüküm no: 564 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanime bt. Bağdisar’ın berber dükkânı eşyalarını satması Berber gediği, 2200 guruş Mahmiye-i İstanbul’da Sulumanastır kurbünde Ağa Hamamı nâm mahâlde mütemekkine ve şahsı zeyl-i rakīmde muharrerü’l-esâmî kimesneler ta‘rîfleriyle mu‘arrefe olan Hanime bt. Bağdisar nâm Nasrâniye meclis-i şer‘-i hatîr-i lâzımü’t-tevkīrde işbu hâmilü’r-rakīm Aci Anderyas v. Kirkor zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Samatya kurbünde kolluk karşısında kâin ma‘lûmü’l-hudûd iki kepenk beher şehr iki guruş kirâ-yı kadîmeli bir bâb berber dükkânı derûnunda mevcûde Başmuhâsebe Kalemi’nde mukayyed şurût-ı nizâmda dâhil ve beyne’l-esnâf gedik ta‘bîr olunur müstakıllen yedimde emvâlim olan bir kazgan ve on ustura ve iki kayış ve iki mikrâs ve iki mir’ât ve iki satıl ve iki leğen ve bir tas ve bir tepsi ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Aci Anderyas zimmîye iki bin iki yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikdensonra semeni olan meblağ-ı mezbûr iki bin iki yüz guruşu müşteri-yi mersûm bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d âlât-ı muharrere-i mezkûre mersûm Aci Anderyas zimmînin emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 25 L sene [1]242. Şühûdü’l-hâl: Muhzır Ebûbekir Çelebi, Muhzır Ali Çelebi.