Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 477 Hüküm no: 565 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe bt. Abdullah’ın Kavukçular çarşısındaki Kavukçu dükkânı eşyalarını satması Kavukçu gediği, 1500 guruş Mahmiye-i İstanbul’da Laleli kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Nesibe bt. Abdullah nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Hadice bt. Hasan nâm hatun mahzarında ikrâr-ı tam ve takrîr-i kelâm edip mahmiye-i mezbûrede Çarşı-yı kebîr’de Kavukçular sûkunda vâki‘ Abacı ve Kavukçu Mehmed Emin Ağa dükkânları beynlerinde kâin bir bâb kavukçu dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye müstakılleten yedimde emvâlim olan dört kalıp ve bir sandık ve bir mikrâs ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûre Hadice Hatun’a bin beş yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin beş yüz guruşu müşteriye-i mezbûre Hadice Hatun yedinden tamamen ahz ü kabz eyledim. Fîmâ-ba‘d âlât-ı muharrere-i mezkûre mezbûre Hatice Hatun’un emvâl-i müşterâsı ve hakk-ı sırfı olup benimkat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 21 L sene [1]242 Şühûdü’l-hâl: el-Hâc Ahmed b. Mehmed Said, Mehmed Emin Efendi b. Mustafa, Halil Çelebi b. Mustafa, Ali Çelebi el-muhzır, Abdulfettah Çelebi el-muhzır.