Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 478 Hüküm no: 566 Orijinal metin no: [87a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayseri’nin İncesu köy halkından Bakkal İsak ve kardeşi Yuvan’ın Bakkal Hıristo’dan aldıkları borç karşılığında bağlarını bey bi’l-vefâ suretiyle satmaları Rehin 800 guruş Vilâyet-i Anadolu’da Kayseriye kazâsına tâbi‘ İncesu karyesi re‘âyâsından olup mahmiye-i İstanbul’da Ayasofya-i kebîr kurbünde Dörtyol ağzında mütemekkin Bakkāl İsak v. ( ) ve li-ebeveyn er karındaşı olup mahmiye-i mezbûrede Ma‘cûncu fırınında mütemekkin Yuvan veledey [87b] Ananya zimmîler meclis-i şer‘-i hatîr-i lâzımü’t-tevkīrde işbu hâmilü’r-rakīm Bakkāl Hıristo v. Kiryako zimmî muvâcehesinde her biri ikrâr-ı tam ve takrîr-i kelâm edip bizim mersûm Hıristo zimmîye zimmetimizde bundan akdem malından ve yedinden bi’l-ma‘iye iktirâz ve kabz eylediğimiz sekiz yüz guruş deynimiz mukābelesinde karye-i mezbûre civârında Kürt Yolu’nda Kayabaşı nâm mahâlde vâki‘ bir tarafdan Topuzoğlu Atos zimmî bağı ve bir tarafdan Kalaycı Simyon zimmî bağı ve bir tarafdan Kâhya Aspuzi zimmî bağı ve taraf-ı râbi‘i tarîk-i âm ile mahdûd altı hark iştirâken mülkümüz olan bir kıt‘a kürûmu mülk bağımızı bundan akdem mersûm Hıristo zimmîye mahâllinde vefâen bey‘ ve teslîm eylediğimizde ol dahi iştirâ ve tesellüm ve kabûl edip ol-vechile bağ-ı mahdûd-ı mezkûr mersûm Aspuzi zimmîmin mülk-i müşterâsı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 L sene [1]242. Şühûdü’l-hâl: Muhzır Mehmed Emin Çelebi, Muhzır Ali Çelebi, Muhzır Feyzullah Çelebi.