Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 478 Hüküm no: 567 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihrimah Sultan Camii Hatibinin vekili Hafız Mustafa Efendi’nin Büyük Çarşı’daki altıncı dükkânı âletlerini satması Nısf altıncı gediği, 400 guruş Medîne-i Üsküdar’da Hasanağa mahallesinde sâkin Mihrimah Sultan Câmi‘-i şerîfi hatîbinin vekîli Hafız Mustafa Efendi b. Mehmed Emin meclis-i şer‘-i şerîf-i enverde altıncı esnâfından işbu bâ‘isü’l-vesîka el-Hâc Ali b. el-Hâc Mustafa mahzarında ikrâr-ı tam ve takrîr-i kelâm edip mahmiye-i İstanbul’da Çarşı-yı kebîr’de Bezzâzistân-ı atik kurbünde altıncı ve çubukçu dükkânları beynlerinde kâin bir bâb altıncı dükkânı derûnunda mevcûde beyne’l-esnâf gedik ta‘bîr olunur dört tas ve dört kürsü ve dört çekiç ve sâir âlât-ı lâzıme-i ma‘lûmenin nısfları bi’l-irsi’ş-şer‘î benim ve nısf-ı şâyi‘-i âharları âharın ale’l-iştirâki’s-seviyy yedimizde mülk ve hakkımız olmağla ben âlât-ı muharrere-i mezkûrede ber-vech-i muharrer mâlik olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk merkūm el-Hâc Ali Ağa’ya dört yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr dört yüz guruşu müşteri-yi merkūm bana def‘ ü teslîm ben dahi yedinden tamamen ve kâmilen ahz ü kabz eyledim. Fîmâ-ba‘d âlât-ı muharrere-i mezkûrenin nısfları merkūm el-Hâc Ali Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ ve iskāt eyleyip ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 24 L sene [1]242. Şühûdü’l-hâl: Muhzır Ali Çelebi, Kethudâ Mustafa Ağa, Yiğitbaşı Osman Ağa, es-Seyyid Ragıb Ağa b. Ömer, es-Seyyid Edhem b. Ahmed, es-Seyyid Hamza b. es-Seyyid Hasan, Muhzır Mehmed Çelebi.