Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 479 Hüküm no: 568 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naile bt. Hüseyin’in vefat eden eşinden ve oğlundan intikal eden menzil hissesini diğer vâris Seyyid Hacı Ahmed Said’e satması Arsa mübâya‘ası, 50 guruş Mahmiye-i İstanbul’da Ayasofya kurbünde Üskübî mahallesi ahâlisinden olup Hacc-ı şerîfde fevt olan es-Seyyid el-Hâc Feyzullah b. es-Seyyid Mustafa’nın verâseti zevce-i menkûha-i metrûkesi Nâile bt. Hüseyin b. Mehmed nâm Hatun ile sulbî kebîr oğulları es-Seyyid el-Hâc Ahmed Said Efendi ve es-Seyyid Mustafa Nuri Efendi’ye münhasıra ba‘dehû kable’l-kısmet merkūm es-Seyyid Mustafa Nuri Efendi dahi fevt olup verâseti vâlidesi mezbûre ile karındaşı merkūme münhasıra ve tashîh-i meselesi kırk sekiz sehmden olup sihâm-ı mezbûreden on üç sehmi mezbûre Nâile Hatun’a ve otuz beş sehmi merkūm es-Seyyid el-Hâc Ahmed Said Efendi’ye isâbeti tahakkukundan sonra mezbûre Nâile Hatun tarafından husûs-ı âti’l-beyânda ikrâra vekîl olduğu zâtını ârifân Yusuf Ağa b. Abdullah ve es-Seyyid el-Hâc Mustafa Efendi b. el-Hâc Abdullah şehâdetleriyle sâbit olan Ahmed Efendi b. Mehmed Emin meclis-i şer‘-i şerîf-i enverde işbu bâ‘isü’l-vesîka merkūm es-Seyyid el-Hâc Ahmed Said Efendi mahzarında bi’l-vekâle ikrâr-ı tam ve takrîr-i kelâm edip müvekkilem mezbûre Nâile Hatun zikr olunan Üskübî mahallesinde vâki‘ bir tarafdan Nazif Ağa arsası ve bir tarafdan müşteri-yi merkūm arsası ve bir tarafdan Numan Bey arsası ve bir tarafdan tarîk-i âm ile mahdûd ve bi-hesâbı terbî‘î altı yüz seksen sekiz zirâ‘ arsa-i hâliye müteveffâ-yı evvel-i merkūmun hayatında üç kıt‘a hüccet-i şer‘iye mantûkunca ile’l-vefât yedinde mülkü olup ba‘de vefâtihimâ müvekkile-i mezbûre Nâile Hatun ile oğlu merkūm es-Seyyid el-Hâc Ahmed Said Efendi’ye mevrûs olmağla ben arsa-i mahdûd-ı mezkûrda ber-münâsaha-i merkūm mâlike olduğum on üç sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm es-Seyyid el-Hâc Ahmed Said Efendi’ye elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikdensonra semeni olan meblağ-ı mezbûr elli guruşu müşteri-yi merkūm bana def‘ ü teslîm, ben dahi yedinden bi’l-vekâle tamamen ahz ü kabz eyledim. Fîmâ-ba‘d arsa-i mahdûd-ı mezkûrun mecmû‘u merkūm es-Seyyid el-Hâc Ahmed Said Efendi’nin irsen ve şirâen mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 24 L sene [1]242. Şühûdü’l-hâl: Muhzır Ali Çelebi, Muhzır Emin Çelebi.