Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 480 Hüküm no: 569 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Seyyid Abdullah’ın bazı ev eşyalarını satması 550 guruş, eşyâ mübâya‘ası, hibe Mahmiye-i İstanbul’da Sekbânbaşı İbrahim Ağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Afife bt. es-Seyyid Abdullah nâm hatun meclis-i şer‘-i şerîf-i enverde işbu bâ‘isü’l-vesîka es-Seyyid Mahmud Efendi b. es-Seyyid el-Hâc Ebîbekir mahzarında ikrâr-ı tam ve takrîr-i kelâm edip eşyâ-yı memlûkemden dört minder ve on iki yasdık ve üç mak‘ad ve üç şilte ve bir keçe ve bir koltuk yasdığı ve iki kākum kürk ve bir tulum semmûr kürk ve biri ipekli ve bir yeşil şalî entari ve dört şalvar ve bir şal ve yirmi sahan ma‘a kapak ve iki mangal ve altı tencere ve iki tâbe ve altı güğüm ve iki leğen ma‘a ibrik ve bir kazgan ve bir kebîr tencere, sagīr ve kebîr iki maşraba ve beş şamdan ve altı yorgan ve iki döşek ve beş çârşebimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Mahmud Efendi’ye beş yüz elli guruşa bey‘ ü temlik ve yine müstakılleten yedimde emvâlim olan biri zümrüd ve biri elmas iki gül yüzük ve bir elmas ay ve biri elmas göbekli biri altın iki kuşağımı dahi mezbûr es-Seyyid Mahmud Efendi’ye hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz elli guruşu müşteri-yi mezbûr es-Seyyid Mahmud Efendi bana def‘ ü teslîm, ben dahi yedinden tamamen ahz ü kabz edip min-ba‘d eşyâ-yı muharrere-i mezkûre merkūm es-Seyyid Mahmud Efendi’nin emvâl-i müşterâsı ve mârrü’z-zikr huliyyât dahi emvâl-i mevhûbesi ve hakk-ı sırfı olup benim kat‘a [88a] alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 20 L sene [1]242. Şühûdü’l-hâl: el-Hâc İbrahim b. Mahmud, Mehmed Emin Çelebi, Ebûbekir Çelebi, Hüseyin Ağa b. Ali, Hüseyin Ağa, Berber Mahmud Ağa b. el-Hâc İbrahim.